Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 99: Long Wanfala Rum Antap

Story 99: Long Wanfala Rum Antap

DISTAEM hem Thursday naet, tufala day go pas finis. Jesus and 12-fala aposol bilong hem olketa kam long disfala bigfala rum antap for kaikaim Passover. Man wea hem go aot hem Judas Is‧car′i‧ot. Hem go for talem olketa priest hao olketa savve kasholem Jesus.

Evening kaikai bilong Lord

Long day bifor, Judas hem go and askem olketa: ‘Wanem nao iufala bae givim mi sapos mi helpem iufala for kasholem Jesus?’ Olketa sei: ‘Thirti silver selen.’ So Judas hem go distaem for meetim olketa man for tekem olketa kam long Jesus. Datwan hem nogud tumas!

Passover kaikai hem finis nao. Bat Jesus startim narafala spesol kaikai. Hem givim bred long olketa aposol bilong hem and sei: ‘Kaikaim, bikos diswan minim body bilong mi wea mi bae givim for iufala.’ Then hem givim olketa wanfala kap wine and sei: ‘Drinkim, bikos diswan minim blood bilong mi wea mi bae kapsaetem for iufala.’ Bible kolem diswan ‘evening kaikai bilong Lord.’

Olketa Israelite kaikaim Passover for tingim taem wea angel bilong God ‘go pas’ long haos bilong olketa long Egypt, bat hem killim dae firstborn bilong olketa long Egypt. Bat distaem Jesus laekem olketa for rememberim hem, and hao hem givim laef bilong hem for olketa. Hem talem olketa for celebratem disfala spesol kaikai evri year.

Bihaen olketa kaikaim Evening Kaikai Bilong Lord, Jesus talem olketa aposol bilong hem for strong long faith and for no fraet. Lastfala samting, olketa singim olketa singsing long God and then olketa go. Hem leit fogud, maet hem winim 12 klok. Bae iumi lukim wea nao olketa go.

Matthew 26:14-30; Luke 22:1-39; John chapter 13 go kasem 17; 1 Corinthians 11:20.



Olketa Kwestin

  • Long piksa, why nao Jesus and 12-fala aposol bilong hem insaed wanfala big rum?
  • Hu nao man wea go aot, and wanem nao bae hem duim?
  • Bihaen long Passover kaikai, wanem spesol kaikai nao Jesus startim?
  • Passover hem remindim olketa Israelite long wanem samting, and disfala spesol kaikai hem remindim olketa follower bilong Jesus long wanem?
  • Bihaen long Evening Kaikai Bilong Lord, wanem nao Jesus talem long olketa follower bilong hem, and wanem nao olketa duim?

Samfala extra kwestin

  • Readim Matthew 26:14-30.

    Hao nao Matthew 26:15 showimaot wei wea Judas min for givim Jesus go long olketa enemy?

    Blood wea Jesus pourimaot hem duim wanem tufala samting? (Matt. 26:27, 28; Jer. 31:31-33; Eph. 1:7; Heb. 9:19, 20)

  • Readim Luke 22:1-39.

    Long wanem wei nao Satan go insaed long Judas? (Luke 22:3; John 13:2; Acts 1:24, 25)

  • Readim John 13:1-20.

    From samting wea John 13:2 hem talem, waswe, Judas savve kasem blame for samting hem duim, and wanem leson nao olketa servant bilong God savve lanem from diswan? (Gen. 4:7; 2 Cor. 2:11; Gal. 6:1; Jas. 1:13, 14)

    Wanem barava important leson nao Jesus givim? (John 13:15; Matt. 23:11; 1 Pet. 2:21)

  • Readim John 17:1-26.

    Wanem nao Jesus minim taem hem prea for olketa follower bilong hem for “kamap wan”? (John 17:11, 21-23; Rom. 13:8; 14:19; Col. 3:14)