Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 98: Long Maunten Bilong Olives

Story 98: Long Maunten Bilong Olives

DISWAN hem Jesus long Maunten bilong Olives. Fofala man witim hem olketa aposol bilong hem. Tufala brata Andrew and Peter, and nara tufala brata James and John. Iu savve lukim temple bilong God long Jerusalem long bihaen.

Tufala day go pas finis from taem wea Jesus raed go long Jerusalem antap long young donkey. Distaem hem Tuesday nao. Long morning Jesus hem stap long temple. Olketa priest trae for kasholem Jesus long there for killim hem dae. Bat olketa fraet for duim diswan from olketa pipol laekem Jesus.

Jesus and olketa aposol bilong hem

Jesus hem sei long olketa bigman bilong religion: ‘Iufala olketa snek and son bilong olketa snek!’ Then Jesus sei God bae panisim olketa from evri nogud samting wea olketa duim. Bihaen long datwan Jesus kamap long Maunten bilong Olives, and then fofala aposol hia start for askem hem olketa kwestin. Waswe, iu savve wanem nao olketa askem long Jesus?

Olketa aposol ask abaotem olketa samting wea bae happen long future. Olketa savve Jesus bae finisim evri nogud samting long earth. Bat olketa laek for savve wanem taem diswan bae happen. Wanem taem nao Jesus bae kam bak moa for rul olsem King?

Jesus savve olketa follower bilong hem long earth bae no fit for lukim hem taem hem kam bak moa. Diswan from hem bae stap long heven, and olketa no fit for lukim hem long there. So Jesus talem olketa aposol abaotem samfala samting wea bae happen long earth taem hem rul olsem King long heven. Wanem nao samfala samting hia?

Jesus sei bae olketa bigfala war kamap, plande pipol bae sik and hangre, wei for brekem law bae nogud tumas and olketa bigfala earthquake bae kamap. Jesus sei pipol bae preachim tu gud nius abaotem kingdom bilong God evriwea long earth. Waswe, iumi lukim evri samting hia happen long taem bilong iumi? Ia! And iumi sure Jesus hem rul distaem long heven. Klosap nao hem bae finisim evri nogud samting long earth.

Matthew 21:46; 23:1-39; 24:1-14; Mark 13:3-10.



Olketa Kwestin

  • Long piksa, hu long olketa man hia nao Jesus, and hu nao olketa narawan?
  • Wanem nao olketa priest trae for duim long Jesus insaed temple, and wanem nao hem talem long olketa?
  • Wanem nao olketa aposol askem long Jesus?
  • Why nao Jesus talem olketa aposol bilong hem samfala samting wea bae happen long earth taem hem rul olsem King long heven?
  • Wanem nao Jesus sei bae happen bifor hem finisim evri nogud fasin long earth?

Samfala extra kwestin

  • Readim Matthew 23:1-39.

    Nomata Bible showimaot maet hem fitim for pipol long world garem title, wanem nao toktok bilong Jesus long Matthew 23:8-11 showimaot saed long wei for iusim olketa title for apim man insaed Christian kongregeson? (Acts 26:25; Rom. 13:7; 1 Pet. 2:13, 14)

    Wanem nao olketa Pharisee duim for trae stopem pipol for kamap olketa Christian, and hao nao olketa bigman bilong religion distaem duim sem samting? (Matt. 23:13; Luke 11:52; John 9:22; 12:42; 1 Thess. 2:16)

  • Readim Matthew 24:1-14.

    Hao nao Matthew 24:13 strongim hao hem barava important for gohed strong and no givap?

    Wanem nao mining bilong disfala word “end” long Matthew 24:13? (Matt. 16:27; Rom. 14:10-12; 2 Cor. 5:10)

  • Readim Mark 13:3-10.

    Wanem toktok long Mark 13:10 nao showimaot hao hem important tumas for preachim gud nius, and hao nao toktok bilong Jesus shud affectim iumi? (Rom. 13:11, 12; 1 Cor. 7:29-31; 2 Tim. 4:2)