Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 95: Wei wea Jesus Hem Teach

Story 95: Wei wea Jesus Hem Teach

WANDAY Jesus talem wanfala man hao hem mas lovem neiba bilong hem. Man hia askem Jesus: ‘Hu nao neiba bilong mi?’ Jesus savve wanem nao man hia hem tingim. Man hia hem tingse pipol wea neiba bilong hem nao, hem pipol from sem ples and wea garem sem religion olsem hem. So bae iumi lukim wanem Jesus talem hem.

Samfala taem Jesus hem teachim pipol long wei for talem wanfala story. So hem nao wanem hem duim. Hem talem story abaotem wanfala Jew and wanfala Sa‧mar′i‧tan. Iumi lanem finis hao plande Jew no laekem olketa Sa‧mar′i‧tan. Story bilong Jesus hem olsem:

Wanday wanfala Jew hem go daon long wanfala maunten road wea go for Jer′i‧cho. Bat olketa man for steal attakim hem. Olketa tekem selen bilong hem and hitim hem nogud mekem hem klosap dae.

Bihaen, wanfala Jew priest hem kam long datfala road. Hem lukim man hia wea olketa hitim nogud. Waswe, iu savve wanem nao hem duim? Hem katkros long narasaed long road and gohed for wakabaot go. Then narafala man bilong religion hem kam. Hem wanfala Levite. Waswe, hem stop? Nomoa, hem no stop for helpem man hia tu. Iu savve lukim datfala priest and Levite olketa wakabaot go daon long road.

Bat lukim hu nao long hia witim disfala man wea olketa hitim nogud. Hem wanfala Sa‧mar′i‧tan. And hem helpem disfala Jew. Hem putim medicine long kill bilong man hia. Bihaen, hem tekem disfala Jew long wanfala ples wea hem savve rest and kamap gud.

Kaenfala Samaritan

Bihaen long story bilong hem, Jesus hem sei long man wea askem hem datfala kwestin: ‘Hu nao long thrifala hia hem kamap olsem neiba long man wea olketa hitim nogud? Waswe, hem datfala priest, datfala Levite or datfala Sa‧mar′i‧tan?’

Man hia hem sei: ‘Datfala Sa‧mar′i‧tan man. Hem showimaot kaenfala fasin long man wea olketa hitim nogud.’

Jesus hem sei: ‘Hem stret. So go and duim sem samting long nara pipol.’

Waswe, iu laekem wei wea Jesus hem teach? Iumi savve lanem plande important samting moa sapos iumi lisin long samting wea Jesus talem long Bible, iaman?

Luke 10:25-37.



Olketa Kwestin

  • Wanem kwestin nao wanfala man askem long Jesus, and why nao hem duim datwan?
  • Samfala taem, wanem nao Jesus iusim taem hem teach, and wanem nao iumi lanem finis abaotem olketa Jew and Samaritan?
  • Long story bilong Jesus, wanem nao happen long wanfala Jew man wea gogo long road for Jericho?
  • Wanem nao happen taem wanfala Jew priest and wanfala Levite kam followim datfala road?
  • Long piksa, hu nao helpem datfala Jew man wea garekil?
  • Bihaen Jesus finisim story bilong hem, wanem kwestin nao hem askem, and hao nao datfala man hem ansa?

Samfala extra kwestin

  • Readim Luke 10:25-37.

    Winim wei for talem nomoa ansa, hao nao Jesus helpem wanfala man wea savve gud long Law for ting raonem samting? (Luke 10:26; Matt. 16:13-16)

    Hao nao Jesus iusim olketa tokpiksa for helpem pipol wea lisin long hem for no garem fasin for ting daonem narawan? (Luke 10:36, 37; 18:9-14; Titus 1:9)