Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 94: Hem Lovem Olketa Pikinini

Story 94: Hem Lovem Olketa Pikinini

LUKIM Jesus hem holem disfala smol boy. Diswan showimaot hem barava kea for olketa pikinini. Olketa wea luk kam hem olketa aposol bilong hem. Wanem nao Jesus talem long olketa?

Jesus and olketa aposol bilong hem just kam bak from longfala wakabaot. Taem olketa wakabaot olketa aposol argue midolwan long olketa seleva. So bihaen nao, Jesus hem askem olketa: ‘Wanem nao iufala argue abaotem long road?’ Jesus hem savve wanem olketa argue abaotem. Bat hem askem olketa for lukim sapos olketa bae talem hem or nomoa.

Jesus witim wanfala pikinini

Olketa aposol no ansa, bikos long road olketa argue abaotem hu nao long olketa hem nambawan. Samfala aposol want for kamap moa important winim narawan. Hao nao Jesus bae talem olketa hao hem no stret for laek kamap nambawan?

Hem kolem kam disfala smol boy, and mekem hem standap front long evriwan. Then hem sei long olketa disaepol bilong hem: ‘Mi laekem iufala for savve gud hao sapos iufala no change and kamap olsem olketa smolfala pikinini, iufala bae nating go insaed long kingdom bilong God. Man wea kamap bigman insaed long kingdom mas kamap olsem disfala pikinini.’ Waswe, iu savve why nao Jesus talem diswan?

Olketa smol pikinini no wari abaotem hu nao big or moa important winim narawan. So olketa aposol mas lane for kamap olsem olketa pikinini and for no raoa abaotem hu nao hem big or important.

Long olketa narataem tu Jesus showimaot wei wea hem barava kea for olketa smolfala pikinini. Tu-thri month bihaen, samfala pipol tekem kam olketa pikinini bilong olketa for lukim Jesus. Olketa aposol trae for stopem olketa for kam klosap. Bat Jesus talem olketa aposol bilong hem: ‘Letem olketa pikinini kam long mi, and no trae for stopem olketa, bikos kingdom bilong God hem bilong olketa olsem.’ Then Jesus holem olketa pikinini, and blessim olketa. Hem gud tumas for savve Jesus lovem olketa smolfala pikinini, iaman?

Matthew 18:1-4; 19:13-15; Mark 9:3-37; 10:13-16.



Olketa Kwestin

  • Wanem nao olketa aposol argue abaotem taem olketa kakam bak from wanfala big gogo bilong olketa?
  • Why nao Jesus kolem kam wanfala smol pikinini and mekem hem standap midolwan olketa aposol?
  • Olketa aposol shud lane for olsem olketa pikinini long wanem wei?
  • Tu-thri month bihaen, hao nao Jesus showimaot hem lovem olketa pikinini?

Samfala extra kwestin

  • Readim Matthew 18:1-4.

    Why nao Jesus iusim olketa tokpiksa for teach? (Matt. 13:34, 36; Mark 4:33, 34)

  • Readim Matthew 19:13-15.

    Wanem nao olketa fasin bilong olketa smol pikinini wea iumi mas followim sapos iumi laek for kasem olketa blessing from Kingdom? (Ps. 25:9; 138:6; 1 Cor. 14:20)

  • Readim Mark 9:33-37.

    Wanem nao Jesus teachim long olketa disaepol bilong hem saed long wei for laekem hae position? (Mark 9:35; Matt. 20:25, 26; Gal. 6:3; Phil. 2:5-8)

  • Readim Mark 10:13-16.

    Waswe, pipol feel free for go story long Jesus, and wanem nao olketa Christian elder savve lanem from example bilong hem? (Mark. 6:30-34; Phil. 2:1-4; 1 Tim. 4:12)