Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 91: Jesus Teach Long Maunten

Story 91: Jesus Teach Long Maunten

LUKIM Jesus hem sidaon long hia. Hem teachim olketa pipol hia antap long wanfala maunten long Gal′i‧lee. Olketa wea sidaon klosap long hem olketa disaepol bilong hem. Hem chusim 12-fala long olketa for kamap olketa aposol. Olketa aposol olketa spesol disaepol bilong Jesus. Waswe, iu savve long nem bilong olketa?

Jesus teachim pipol

Wanfala hem Simon Peter and brata bilong hem Andrew. Nara tufala hem James and brata bilong hem John. Tufala moa garem nem James and Simon tu. Tufala aposol garem nem Judas. Wanfala hem Judas Is‧car′i‧ot, and nem bilong narafala Judas hem Thad‧dae′us. Olketa narawan nao hem Philip and Na‧than′a‧el (wea olketa kolem Bar‧thol′o‧mew), and Matthew and Thomas.

Bihaen hem kam bak from Sa‧mar′i‧a, hem firstaem wea Jesus start for talemaot hao ‘kingdom bilong heven hem klosap.’ Waswe, iu savve wanem nao datfala kingdom? Hem wanfala really gavman bilong God. Jesus nao king bilong hem. Hem bae rul from heven and mekem earth garem peace. Kingdom bilong God bae mekem full earth kamap wanfala paradaes wea luk naes tumas.

Long piksa hia Jesus hem teachim pipol abaotem kingdom. Hem sei olsem: “Iufala shud prea olsem: ‘Dadi bilong mifala wea stap long heven, mekem nem bilong iu kamap holy. Mekem kingdom bilong iu kam. Mekem will bilong iu kamap long earth, olsem long heven.’” Plande pipol kolem diswan ‘Lord’s Prea.’ Nara pipol kolem ‘Our Father’ prea. Waswe, iu savve long full prea?

Jesus hem teachim pipol tu hao for deal witim nara pipol. Hem sei: ‘Evri samting iufala laekem nara pipol for duim long iufala, iufala mas duim long olketa.’ Waswe, iu hapi taem pipol showimaot kaenfala fasin long iu? So, Jesus talem hao iumi shud showimaot kaenfala fasin long nara pipol. Hem bae gud tumas long paradaes earth taem evriwan showimaot disfala fasin, iaman?

Matthew chapter 5 go kasem 7; 10:1-4.



Olketa Kwestin

  • Long piksa, Jesus hem teach long wea, and hu nao olketa wea sidaon barava klosap long hem?
  • Hu nao nem bilong 12-fala aposol?
  • Wanem nao datfala Kingdom wea Jesus hem preach abaotem?
  • Jesus hem teachim olketa pipol for prea for wanem?
  • Wanem nao Jesus talem abaotem wei wea pipol shud deal witim each other?

Samfala extra kwestin

  • Readim Matthew 5:1-12.

    Wanem nao olketa wei wea iumi savve showimaot iumi tingim spiritual need bilong iumi? (Matt. 5:3; Rom. 10:13-15; 1 Tim. 4:13, 15, 16)

  • Readim Matthew 5:21-26.

    Long wanem wei nao Matthew 5:23, 24 strongim hao wei wea iumi fren witim olketa brata bilong iumi hem affectim wei wea iumi fren witim Jehovah? (Matt. 6:14, 15; Ps. 133:1; Col. 3:13; 1 John 4:20)

  • Readim Matthew 6:1-8.

    Olketa Christian mas stap klia long olketa wanem wei for tingse olketa seleva raeteous? (Luke 18:11, 12; 1 Cor. 4:6, 7; 2 Cor. 9:7)

  • Readim Matthew 6:25-34.

    Wanem nao Jesus teachim abaotem wei wea iumi need for trust long Jehovah for provaedem material need bilong iumi? (Ex. 16:4; Ps. 37:25; Phil. 4:6)

  • Readim Matthew 7:1-11.

    Wanem nao iumi lanem from kliafala tokpiksa long Matthew 7:5? (Prov. 26:12; Rom. 2:1; 14:10; Jas. 4:11, 12)