Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 88: John Baptaesim Jesus

Story 88: John Baptaesim Jesus

LUKIM kurukuru wea kam daon long hed bilong disfala man. Man hia hem Jesus. Hem 30 year distaem. And nara man witim hem, hem John. Iumi lanem lelebet samting abaotem hem finis. Waswe, iu rememberim taem Mary go for visitim wantok bilong hem Elizabeth, and baby insaed long Elizabeth hem jamp witim hapi? Datfala baby wea no born yet hem John. Bat wanem nao John and Jesus duim long hia?

Jesus taem hem baptaes

John hem just finis for putim Jesus anda long wata long Jordan River and liftim hem kamaot moa. Diswan nao hem wei for man hem baptaes. From diswan nao samting wea John duim long pipol, olketa kolem hem John Baptaesa. Bat why nao John baptaesim Jesus?

John hem duim diswan from Jesus askem John for baptaesim hem. John hem baptaesim pipol wea want for showimaot wei wea olketa sorre long olketa nogud samting wea olketa duim. Bat waswe, Jesus duim eni samting wea mekem hem fit for sorre? Nomoa, Jesus nating duim, from hem nao Son bilong God from heven. So hem askem John for baptaesim hem for difren reason. Bae iumi lukim wanem nao datfala reason.

Bifor Jesus kam long John, hem wanfala carpenter. Carpenter hem man wea wakem samting from timba, olsem tebol and chair. Hasband bilong Mary, Joseph, hem wanfala carpenter, and hem lanem Jesus tu for carpenter. Bat Jehovah no sendem Son bilong hem long earth for kamap wanfala carpenter. Hem garem spesol waka for duim, and hem taem nao for Jesus start for duim diswan. So for showimaot hem kam for duim will bilong Dadi bilong hem, Jesus askem John for baptaesim hem. Waswe, God hapi witim diswan?

Ia, hem hapi, bikos bihaen Jesus kamaot from wata, wanfala voice from heven hem sei: ‘Diswan hem Son bilong mi, wea mi hapi long hem.’ And tu, hem luk olsem heven hem open and disfala kurukuru kam daon antap long Jesus. Hem no wanfala really kurukuru. Bat hem luk olsem wanfala kurukuru. Hem holy spirit bilong God.

From diswan, Jesus need for ting raonem plande samting, so hem go long wanfala ples seleva for 40 day. Long there Satan kam long hem. Thrifala taem Satan hem trae for mekem Jesus duim samting againstim olketa law bilong God. Bat Jesus no duim.

Bihaen long datwan, Jesus kam bak and meetim samfala man wea kamap olketa firstfala follower, or disaepol bilong hem. Nem bilong samfala nao Andrew, Peter (olketa kolem hem Simon tu), Philip and Na‧than′a‧el (olketa kolem hem Bar‧thol′o‧mew tu). Jesus and olketa disaepol hia go long Gal′i‧lee. Long Gal′i‧lee olketa stap long homtaon bilong Na‧than′a‧el wea hem nao Ca′na. Long there Jesus hem go long wanfala bigfala marit feast, and hem duim firstfala mirakol bilong hem. Waswe, iu savve wanem nao diswan? Hem mekem wata for kamap wine.

Matthew 3:13-17; 4:1-11; 13:55; Mark 6:3; John 1:29-51; 2:-12.



Olketa Kwestin

  • Hu nao tufala man insaed piksa?
  • Hao nao for baptaesim man?
  • Plande taem, hu nao pipol wea John hem baptaesim?
  • Wanem nao spesol reason why Jesus askem John for baptaesim hem?
  • Hao nao God showimaot Hem hapi from Jesus baptaes?
  • Wanem nao happen taem Jesus go long wanfala kwaet ples for 40 day?
  • Hu nao samfala first follower bilong Jesus, and wanem nao firstfala mirakol bilong hem?

Samfala extra kwestin

  • Readim Matthew 3:13-17.

    Wanem example nao Jesus showimaot for olketa disaepol bilong hem saed long wei for baptaes? (Ps. 40:7, 8; Matt. 28:19, 20; Luke 3:21, 22)

  • Readim Matthew 4:1-11.

    Hao nao wei wea Jesus savve tumas for iusim olketa Scripture hem encouragem iumi for studyim Bible evritaem? (Matt. 4:5-7; 2 Pet. 3:17, 18; 1 John 4:1)

  • Readim John 1:29-51.

    John Baptaesa leadim olketa disaepol bilong hem go long hu, and hao nao iumi savve followim example bilong hem distaem? (John 1:29, 35, 36; 3:30; Matt. 23:10)

  • Readim John 2:1-12.

    Hao nao firstfala mirakol bilong Jesus showimaot Jehovah no hol bak for givim gud samting long olketa servant bilong Hem? (John 2:9, 10; Ps. 84:11; Jas. 1:17)