Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 87: Young Jesus Long Temple

Story 87: Young Jesus Long Temple

LUKIM disfala young boy wea toktok long olketa bigman hia. Olketa hia teacher insaed long temple bilong God long Jerusalem. And boy hia hem Jesus. Hem big lelebet nao. Distaem hem 12 year.

Olketa teacher sapraes tumas from Jesus hem savve long plande samting abaotem God and Bible. Bat why nao Joseph and Mary no stap tu long hia? Olketa long wea nao?

Young Jesus story witim olketa teacher

Evri year Joseph tekem famili bilong hem long Jerusalem for spesol celebration wea olketa kolem Passover. Hem longfala wakabaot from Naz′a‧reth go kasem Jerusalem. No eniwan garem trak. Olketa no garem olketa samting olsem long datfala taem. Plande pipol wakabaot, and olketa mas wakabaot for thrifala day for kasem Jerusalem.

Distaem Joseph garem bigfala famili. So hem mas lukaftarem tu nara young brata and sista bilong Jesus. Long disfala year, Joseph and Mary start for go bak hom long Naz′a‧reth. Tufala tingse Jesus hem witim nara pipol wea olketa gogo tugeta. Bat taem olketa stop long evening, olketa no savve faendem Jesus. Olketa lukaotem hem long olketa wantok and fren bilong olketa, bat hem no stap witim olketa! So tufala go bak long Jerusalem for lukaotem hem long there.

Gogo olketa faendem Jesus long hia witim olketa teacher. Hem gohed for lisin long olketa and askem olketa kwestin. And evriwan sapraes long savve bilong Jesus. Bat Mary hem sei: ‘Son, why nao iu duim diswan long mifala? Mi and dadi bilong iu wari tumas taem mifala trae for faendem iu.’

Jesus hem sei: ‘Why nao iufala lukaotem mi? Waswe, iufala no savve mi mas stap long haos bilong Dadi bilong mi?’

Tru nao, Jesus hem laekem tumas for stap long ples wea hem savve lane abaotem God. Iumi shud garem sem feeling tu, iaman? Long Naz′a‧reth, Jesus savve go long olketa meeting for worship evri week. From hem lisin gud evritaem, hem lanem plande samting from Bible. Iumi laek for followim example bilong Jesus.

Luke 2:41-52; Matthew 13:53-56.



Olketa Kwestin

  • Long piksa Jesus hem haomas year, and wea nao hem?
  • Wea nao Joseph tekem famili bilong hem evri year?
  • Bihaen olketa wakabaot for wanfala full day finis for kasem bak hom, why nao Joseph and Mary go bak moa long Jerusalem?
  • Wea nao Joseph and Mary faendem Jesus, and why nao pipol long there sapraes?
  • Wanem nao Jesus talem long mami bilong hem Mary?
  • Hao nao iumi savve olsem Jesus saed long wei for lane abaotem God?

Samfala extra kwestin

  • Readim Luke 2:41-52.

    Nomata Law sei olketa man nomoa need for attendim olketa festival wea kamap evri year, wanem gudfala example nao Joseph and Mary showimaot for parents distaem? (Luke 2:41; Deut. 16:16; 31:12; Prov. 22:6)

    Hao nao Jesus showimaot gudfala example for olketa young wan distaem saed long wei for stap anda long parents? (Luke 2:51; Deut. 5:16; Prov. 23:22; Col. 3:20)

  • Readim Matthew 13:53-56.

    Hu nao nem bilong fofala really brata bilong Jesus insaed Bible, and wanem waka nao tufala brata bilong hem duim insaed Christian kongregeson bihaen? (Matt. 13:55; Acts 12:17; 15:6, 13; 21:18; Gal. 1:19; Jas. 1:1; Jude 1)