Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 85: Jesus Born Insaed Haos Bilong Olketa Animal

Story 85: Jesus Born Insaed Haos Bilong Olketa Animal

WASWE, iu savve hu nao disfala smol baby? Ia, hem Jesus. Hem born insaed long haos bilong olketa animal. Mary mekem Jesus leidaon insaed samting for putim kaikai bilong olketa donkey and narafala animal. Bat why nao Mary and Joseph stap long hia witim olketa animal? Diswan hem no ples for bornem pikinini, iaman?

Olketa stap long hia from ruler bilong Rome, Caesar Au‧gus′tus, hem mekem wanfala law for evriwan mas go bak long taon wea olketa born for raetem nem bilong olketa insaed wanfala buk. Joseph hem born long Beth′le‧hem. Bat taem hem and Mary kasem long there, no eni ples nao for olketa stap. So olketa mas stap witim olketa animal. Long disfala sem day wea olketa arrive, Mary hem bornem Jesus! Bat, olsem iu lukim, hem healthy nomoa.

Joseph, Mary , and baby Jesus

Waswe, iu savve lukim olketa shepherd wea kam for lukim Jesus? Long datfala naet olketa lukaftarem olketa sheep bilong olketa long field, and wanfala braet laet hem shaen raonem olketa. Hem wanfala angel! Olketa shepherd fraet fogud. Bat angel hem sei: ‘Iufala no fraet! Mi garem gud nius for iufala. Tuday, long Beth′le‧hem, Christ datfala Lord hem born. Hem bae sevem olketa pipol! Iufala savve faendem hem insaed samting for putim kaikai for olketa animal and olketa kavarem hem witim kaleko.’ Seknomoa, plande angel kam and start for praisem God. So stretawe olketa shepherd hia hariap for go lukim Jesus, and olketa faendem hem nao.

Waswe, iu savve why nao Jesus hem barava spesol? Waswe, iu savve long really hu nao hem? Remember, long firstfala story bilong disfala buk iumi story abaotem firstfala Son bilong God. Disfala Son hem waka witim Jehovah for wakem skae and earth and evri nara samting. Datwan hem Jesus!

Jehovah tekem laef bilong Son bilong hem from heven and putim insaed long Mary. So wanfala baby start for grow insaed long hem olsem olketa nara baby grow insaed bele bilong mami bilong olketa. Bat disfala baby hem Son bilong God. Gogo, Jesus hem born long haos bilong olketa animal hia long Beth′le‧hem. Waswe, iu savve nao why olketa angel hapi tumas for talem pipol hao Jesus hem born?

Luke 2:1-20.



Olketa Kwestin

  • Hu nao smol baby insaed long piksa, and wea nao Mary mekem hem leidaon?
  • Why nao Jesus born insaed haos bilong olketa animal?
  • Hu nao olketa man long piksa wea kam insaed long haos bilong olketa animal, and wanem nao wanfala angel talem olketa finis?
  • Why nao Jesus hem spesol?
  • Why nao hem fitim for kolem Jesus Son bilong God?

Samfala extra kwestin

  • Readim Luke 2:1-20.

    Wanem nao Caesar Augustus duim wea help for fulfillim profesi abaotem taem wea Jesus hem born? (Luke 2:1-4; Mic. 5:2)

    Hao nao man savve kamap wanfala long “olketa man wea God hapi long olketa”? (Luke 2:14; Matt. 16:24; John 17:3; Acts 3:19; Heb. 11:6)

    Sapos olketa hambol shepherd bilong Judea garem reason for hapi taem Savior hem born, wanem reason for hapi wea moa big nao olketa servant bilong God distaem garem? (Luke 2:10, 11; Eph. 3:8, 9; Rev. 11:15; 14:6)