Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 101: Olketa Killim Dae Jesus

Story 101: Olketa Killim Dae Jesus

LUKIM nogud samting wea happen long hia! Olketa killim dae Jesus. Olketa putim hem long wanfala post. Olketa nilam hand and leg bilong hem. Wanem nao bae mekem pipol laek duim diswan long Jesus?

Jesus gogo for dae

Hem from samfala pipol heitim Jesus. Waswe, iu savve hu nao olketa? Wanfala long olketa nao hem datfala wicked angel Satan. Hem nao datwan wea mekem Adam and Eve no obeyim Jehovah. And Satan nao mekem olketa enemy bilong Jesus for duim disfala barava nogud samting.

Bifor olketa nilam Jesus long post, olketa enemy bilong hem duim nogud samting long hem. Remember taem olketa kam long garden bilong Geth‧sem′a‧ne and tekem hem? Hu nao olketa enemy hia? Ia, olketa bigman bilong religion. Wanem nao next samting wea happen?

Taem olketa bigman bilong religion tekem Jesus, olketa aposol bilong hem ranawe. From olketa fraet fogud, olketa lusim Jesus and hem stap seleva witim olketa enemy bilong hem. Bat aposol Peter and John no go farawe tumas. Olketa go bihaenem olketa for lukim wanem nao bae happen long Jesus.

Olketa priest tekem Jesus go long olo man An′nas, wea hem hae priest bifor. Olketa no stap for longfala taem long there. Then olketa tekem Jesus go long haos bilong Ca′ia‧phas, wea hem hae priest distaem. Plande bigman bilong religion hipap long haos bilong hem.

Long haos bilong Ca′ia‧phas olketa duim wanfala kot. Olketa tekem kam samfala pipol for talem laea samting abaotem Jesus. Olketa bigman bilong religion sei: ‘Jesus mas dae.’ Then olketa spit long feis bilong hem, and hitim hem.

Taem evri samting hia happen, Peter hem stap aotsaed. Hem wanfala cold naet, so samfala pipol mekem wanfala fire. Taem olketa standap raonem fire, wanfala servant gele luk long Peter, and sei: ‘Disfala man hem stap witim Jesus tu.’

Peter hem sei: ‘Nating, mi no stap witim hem!’

Thrifala taem nao pipol sei Peter hem stap witim Jesus. Bat each taem Peter sei datwan no tru. Long mek-thri taem wea Peter talem diswan, Jesus tan and luk go long hem. Peter hem feel sorre tumas for talem olketa laea toktok hia, so hem go and krae fogud.

Taem sun hem start for kamap long Friday morning, olketa priest tekem Jesus long bigfala ples bilong olketa for meeting, hem nao San′he‧drin hall. Long hia olketa tok abaotem wanem olketa bae duim witim hem. Olketa tekem hem go long Pontius Pilate, wea hem nao ruler bilong Ju‧de′a.

Olketa priest sei long Pilate: ‘Hem wanfala nogud man. Hem mas dae.’ Bihaen hem askem samfala kwestin long Jesus, Pilate sei: ‘Long tingting bilong mi, hem no duim eni rong samting.’ Then Pilate sendem Jesus long Herod An′ti‧pas. Herod hem ruler bilong Gal′i‧lee, bat hem stap long Jerusalem. Long tingting bilong Herod tu, Jesus no duim eni rong samting, so hem sendem hem go bak long Pilate.

Pilate want for letem Jesus go free. Bat olketa enemy bilong Jesus laekem hem for letem narafala prisoner go free. Disfala man hem Bar‧ab′bas, wea hem man for steal. Hem klosap 12 klok taem Pilate tekem Jesus aotsaed. Hem sei: ‘Lukim! King bilong iufala!’ Bat olketa chief priest singaot olsem: ‘Tekem hem go! Killim hem dae! Killim hem dae!’ So Pilate letem Bar‧ab′bas go free, and olketa tekem go Jesus for killim hem dae.

Long Friday aftanun olketa nilam Jesus long wanfala post. Iu no savve lukim olketa long piksa, bat tufala nogud man wea olketa putim olketa for dae long post tu, olketa stap saed long Jesus. Bifor Jesus hem dae, wanfala nogud man hia hem sei long Jesus: ‘No forgetim mi taem iu kasem kingdom bilong iu.’ And Jesus ansa: ‘Mi promisim iu, iu bae stap witim mi long Paradaes.’

Datwan hem nambawan promis, iaman? Iu savve wanem kaen paradaes nao Jesus hem story abaotem? Wea nao datfala paradaes wea God wakem long firstaem hem stap? Ia, long earth. And taem Jesus rul olsem king long heven, hem bae mekem disfala man laef bak for enjoyim niufala Paradaes long earth. Iumi hapi tumas long datwan, iaman?

Matthew 26:57-75; 27:1-50; Luke 22:54-71; 23:1-49; John 18:12-40; 19:1-30.



Olketa Kwestin

  • Hu nao main wan wea kasem blame for wei wea Jesus dae?
  • Wanem nao olketa aposol duim taem olketa bigman bilong religion tekem Jesus?
  • Wanem nao happen long haos bilong datfala hae priest, Caiaphas?
  • Why nao Peter hem go aot and krae?
  • Bihaen olketa tekem Jesus go bak long Pilate, olketa chief priest singaotem wanem toktok?
  • Wanem nao happen long Jesus long start bilong Friday aftanun, and wanem promis nao hem talem long wanfala wicked man wea olketa nilam long wanfala post saed long hem?
  • Paradaes wea Jesus story abaotem bae kamap long wea?

Samfala extra kwestin

  • Readim Matthew 26:57-75.

    Hao nao olketa member bilong Jew hae kot showimaot heart bilong olketa wicked? (Matt. 26:59, 67, 68)

  • Readim Matthew 27:1-50.

    Why nao iumi savve sei wei wea Judas feel sorre hem laea wan nomoa? (Matt. 27:3, 4; Mark 3:29; 14:21; 2 Cor. 7:10, 11)

  • Readim Luke 22:54-71.

    Wanem leson nao iumi savve lanem from wei wea Peter denyim Jesus long naet wea olketa arrestim hem? (Luke 22:60-62; Matt. 26:31-35; 1 Cor. 10:12)

  • Readim Luke 23:1-49.

    Wanem nao Jesus duim taem pipol no deal witim hem long wei wea followim justice, and wanem nao iumi savve lanem from diswan? (Luke 23:33, 34; Rom. 12:17-19; 1 Pet. 2:23)

  • Readim John 18:12-40.

    Wanem nao iumi lanem fromwei wea Peter hem fraet long man for lelebet taem, bat bihaen hem kamap wanfala nambawan aposol? (John 18:25-27; 1 Cor. 4:2; 1 Pet. 3:14, 15; 5:8, 9)

  • Readim John 19:1-30.

    Jesus hem garem wanem balance tingting saed long olketa material samting? (John 2:1, 2, 9, 10; 19:23, 24; Matt. 6:31, 32; 8:20)

    Hao nao lastfala toktok bilong Jesus bifor hem dae showimaot hem win for sapotim sovereign rul bilong Jehovah? (John 16:33; 19:30; 2 Pet. 3:14; 1 John 5:4)