Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 100: Jesus Long Garden

Story 100: Jesus Long Garden

BIHAEN olketa lusim rum antap, Jesus and olketa aposol bilong hem go long garden bilong Geth‧sem′a‧ne. Olketa kam long hia plande taem bifor. Distaem Jesus talem olketa for gohed wekap and for prea. Then hem go lelebet from olketa, and hem nildaon for prea.

Bihaen, Jesus kam bak long ples wea olketa aposol bilong hem stap. Iu ting wanem nao olketa duim? Olketa sleep! Thrifala taem Jesus talem olketa for gohed wekap, bat each taem hem kam bak hem lukim olketa sleep. Long lastfala taem wea hem kam bak, Jesus hem sei: ‘Hao nao iufala savve sleep long taem olsem? Hem kasem taem nao for olketa givim mi go long olketa enemy bilong mi.’

Long semtaem olketa herem wanfala big sekson kam. Lukim! Olketa man hia holem olketa sword and stik! And olketa karem fire for torchim ples hia. Taem olketa kam klosap, samwan hem kam stret long Jesus. Hem kissim hem, olsem iu savve lukim long piksa. Disfala man hem Judas Is‧car′i‧ot! Why nao hem kissim Jesus?

Judas givim go Jesus

Jesus askem hem: ‘Judas, iu givim mi go witim wanfala kiss?’ Tru nao, datfala kiss hem wanfala saen for mekem olketa man savve diswan nao Jesus, man wea olketa laek kasholem. So olketa enemy bilong Jesus holem hem nao. Bat Peter hem redi for faet from hem no laekem olketa for tekem Jesus. Hem aotem sword wea hem karem and trae for hitim man wea stand klosap long hem. Sword hia missim hed bilong datfala man and aotem raet saed ear bilong hem. Bat Jesus tasim ear bilong datfala man and healim.

Jesus talem Peter: ‘Putim bak sword bilong iu long ples bilong hem. Waswe, iu tingse mi no savve askem Dadi bilong mi for sendem plande thousand angel for sevem mi?’ Tru nao, hem savve duim datwan! Bat Jesus no askem God for sendem eni angel, from hem savve hem taem nao for olketa enemy bilong hem for tekem hem. So hem letem olketa leadim hem go. Bae iumi lukim wanem nao happen long Jesus.

Matthew 26:36-56; Luke 22:39-53; John 18:1-12.



Olketa Kwestin

  • Bihaen Jesus and olketa aposol bilong hem lusim rum long datfala haos, olketa go long wea, and wanem nao hem talem olketa for duim?
  • Taem Jesus kam bak long ples wea olketa aposol bilong hem stap, wanem nao hem lukim, and haomas taem nao diswan happen?
  • Hu nao kam insaed datfala garden, and wanem nao Judas Iscariot duim olsem piksa hem showim?
  • Why nao Judas kissim Jesus, and wanem nao Peter duim?
  • Wanem nao Jesus talem long Peter, bat why nao Jesus no askem God for sendem eni angel?

Samfala extra kwestin

  • Readim Matthew 26:36-56.

    Hao nao wei wea Jesus givim kaonsel long olketa disaepol bilong hem showimaot gudfala example for olketa Christian elder distaem? (Matt. 20:25-28; 26:40, 41; Gal. 5:17; Eph. 4:29, 31, 32)

    Wanem nao tingting bilong Jesus abaotem wei for iusim samting for faet againstim nara man? (Matt. 26:52; Luke 6:27, 28; John 18:36)

  • Readim Luke 22:39-53.

    Taem wanfala angel kam long Jesus long garden bilong Gethsemane for strongim hem, waswe, diswan showimaot hao faith bilong Jesus hem start for wikdaon? Explainim diswan. (Luke 22:41-43; Isa. 49:8; Matt. 4:10, 11; Heb. 5:7)

  • Readim John 18:1-12.

    Long wanem wei nao Jesus protectim olketa disaepol bilong hem from pipol wea againstim hem, and wanem nao iumi savve lanem from disfala example? (John 10:11, 12; 18:1, 6-9; Heb. 13:6; Jas. 2:25)