Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 83: Wall Bilong Jerusalem

Story 83: Wall Bilong Jerusalem
Olketa wakaman wakem moa wall bilong Jerusalem

LUKIM bigfala waka wea gohed long hia. Olketa Israelite busy for wakem wall bilong Jerusalem. Taem King Neb‧u‧chad‧nez′zar hem distroem Jerusalem 152 year bifor, hem brekem olketa wall and bonem olketa gate bilong datfala big taon. Olketa Israelite no stretawe wakem olketa wall moa taem olketa kam bak from Babylon.

Hao nao pipol hia feel taem olketa stap plande year long taon bilong olketa wea no garem eni wall? Olketa no feel sef. Hem isi for olketa enemy for kam and attakim olketa. Bat disfala man Ne‧he‧mi′ah hem helpem olketa pipol for wakem moa olketa wall. Waswe, iu savve hu nao Ne‧he‧mi′ah?

Ne‧he‧mi′ah hem wanfala Israelite wea kam from taon bilong Shu′shan, wea Mor′de‧cai and Esther stap. Ne‧he‧mi′ah hem waka insaed long haos bilong king, so maet hem gudfala fren bilong Mor′de‧cai and Queen Esther. Bat Bible no sei Ne‧he‧mi′ah hem waka for hasband bilong Esther, King A‧has‧u‧e′rus. Hem waka for nextfala king, King Ar‧ta‧xerx′es.

Remember hao Ar‧ta‧xerx′es hem datfala gud king wea givim Ez′ra bigfala selen for tekem go bak long Jerusalem for fixim temple bilong Jehovah. Bat Ez′ra no wakem wall bilong datfala taon wea pisis. Iumi laek savve wanem nao happen wea mekem Ne‧he‧mi′ah duim disfala waka.

Thirtin year bihaen Ezra kasem selen from Ar‧ta‧xerx′es for fixim temple, Ne‧he‧mi′ah hem main wan wea servem wine bilong king and for mek sure no eniwan trae for poisonim king. Diswan hem barava important waka.

Wanday brata bilong Ne‧he‧mi′ah, Ha‧na′ni, and samfala nara man from land bilong Israel olketa kam for visitim Ne‧he‧mi′ah. Olketa talem hem abaotem trabol wea kasem olketa Israelite, and hao wall bilong Jerusalem hem nogud yet. Diswan mekem Ne‧he‧mi′ah feel sorre tumas, and hem prea long Jehovah abaotem diswan.

Wanday king lukim hao Ne‧he‧mi′ah hem luk sorre, and hem ask: ‘Why nao iu luk sorre tumas?’ Ne‧he‧mi′ah talem hem hao diswan hem from evri samting long Jerusalem hem nogud tumas and olketa wall pisis. King hem askem hem: ‘Wanem nao iu laekem?’

Nehemiah leadim datfala building waka

Ne‧he‧mi′ah hem sei: ‘Letem mi go long Jerusalem, mekem mi savve wakem moa olketa wall.’ King Ar‧ta‧xerx′es hem kaenfala man. Hem letem Ne‧he‧mi′ah for go, and hem helpem hem for kasem timba for datfala waka. No longtaem bihaen Ne‧he‧mi′ah kasem Jerusalem, hem talem olketa pipol abaotem plan bilong hem. Olketa laekem idea bilong hem and sei: ‘Iumi start for wakem nao.’

Taem olketa enemy bilong olketa Israelite lukim wall wea olketa start for wakem, olketa sei: ‘Iumi bae go and killim olketa dae, and stopem datfala waka.’ Bat Ne‧he‧mi′ah hem herem diswan, and hem givim sword and spia long olketa wakman. And hem sei: ‘No fraet long olketa enemy bilong iumi. Faet for olketa brata bilong iu, for olketa pikinini bilong iu, for waef bilong iu, and haos bilong iu.’

Olketa pipol nating fraet. Long day and naet, olketa redi witim olketa samting bilong olketa for faet, and olketa gohed for waka. So insaed long 52 day nomoa, olketa wall hem finis nao. Olketa pipol feel sef insaed long datfala taon. Ne‧he‧mi′ah and Ez′ra teachim pipol abaotem olketa law bilong God, and olketa pipol hapi.

Bat nomata olsem, evri samting no olsem bifor olketa Israelite kamap prisoner long Babylon. King bilong Persia rulim olketa pipol and olketa mas servem hem. Bat Jehovah hem promis for sendem wanfala niu king, and disfala king bae mekem pipol stap long peace. Hu nao disfala king? Hao nao hem bae mekem peace kamap long earth? Samting olsem 450 year go pas bifor eni samting hem showaot klia abaotem diswan. Then wanfala barava important baby hem born. Bat datwan hem narafala story moa.

Nehemiah chapter 1 go kasem 6.



Olketa Kwestin

  • Hao nao olketa Israelite feel taem no eni wall stap raonem taon bilong olketa, Jerusalem?
  • Hu nao Nehemiah?
  • Wanem nao waka bilong Nehemiah, and why nao datwan hem important?
  • Wanem nius nao mekem Nehemiah feel sorre, and wanem nao hem duim?
  • Hao nao King Artaxerxes showimaot kaenfala fasin long Nehemiah?
  • Hao nao Nehemiah arrangem datfala building waka mekem enemy bilong olketa Israelite no savve stopem?

Samfala extra kwestin

  • Readim Nehemiah 1:4-6 and 2:1-20.

    Hao nao Nehemiah lukaotem direction bilong Jehovah? (Neh. 2:4, 5; Rom. 12:12; 1 Pet. 4:7)

  • Readim Nehemiah 3:3-5.

    Wanem nao olketa elder and ministerial servant savve lanem from wei for markem olketa Tekoite witim olketa man bilong olketa wea “nambawan”? (Neh. 3:5, 27; 2 Thess. 3:7-10; 1 Pet. 5:5)

  • Readim Nehemiah 4:1-23.

    Wanem nao muvim olketa Israelite for gohed build nomata samfala barava againstim olketa? (Neh. 4:6, 8, 9; Ps. 50:15; Isa. 65:13, 14)

    Hao nao example bilong olketa Israelite encouragem iumi distaem?

  • Readim Nehemiah 6:15.

    Wei wea olketa finis for buildim wall bilong Jerusalem insaed tufala month hem showimaot wanem samting abaotem wei for garem strongfala faith? (Ps. 56:3, 4; Matt. 17:20; 19:26)