Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 82: Mordecai and Esther

Story 82: Mordecai and Esther

IUMI ting go bak long tu-thri year bifor Ez′ra go long Jerusalem. Mor′de‧cai and Esther nao tufala barava important Israelite long kingdom bilong Persia. Esther hem queen, and kasin bilong hem Mor′de‧cai, hem main bigman bilong king. Bae iumi lukim hao nao diswan kamap olsem.

Dadi and mami bilong Esther olketa dae taem hem barava smol yet, so Mor′de‧cai nao lukaftarem hem. A‧has‧u‧e′rus, wea hem king bilong Persia, garem wanfala big haos long taon bilong Shu′shan, and Mor′de‧cai hem wanfala servant bilong hem. Wanday waef bilong king, Vash′ti, no obeyim hem, so king chusim wanfala niu waef for kamap queen bilong hem. Waswe, iu savve long woman wea hem chusim? Ia, datfala young gele Esther wea luk naes tumas.

Haman hem kros long Mordecai

Waswe, iu lukim disfala praod man wea pipol baodaon long hem? Diswan hem Ha′man. Hem wanfala barava important man long Persia. Ha′man laekem Mor′de‧cai, wea hem sidaon long there, for baodaon long hem tu. Bat Mor′de‧cai no duim datwan. Hem tingse hem no stret for baodaon long nogud man olsem. Diswan mekem Ha′man kros fogud. So wanem nao hem duim?

Ha′man hem laea long king abaotem olketa Israelite. Hem sei: ‘Olketa hia nogud pipol wea no obeyim olketa law bilong iu. Olketa mas dae.’ A‧has‧u‧e′rus no savve waef bilong hem, Esther, hem wanfala Israelite. So hem lisin long Ha′man, and hem markem wanfala day wea evri Israelite mas dae.

Taem Mor′de‧cai herem disfala law, hem feel nogud tumas. Hem sendem message go long Esther: ‘Iu mas talem king, and askem hem for sevem iumi.’ Hem againstim law long Persia for man go lukim king sapos king no askem hem for kam. Bat Esther hem go nomata king no askem hem. King hem pointim gold stik bilong hem long Esther for showimaot olketa mas no killim hem dae. Esther askem king and Ha′man for kam long wanfala big kaikai. Long there king hem askem Esther wanem nao hem laekem king for givim hem. Esther sei hem bae talem hem sapos hem and Ha′man kam for narafala kaikai moa long nextfala day.

Taem olketa kaikai, Esther talem king: ‘Pipol bilong mi and miseleva mas dae.’ King hem kros long diswan. Hem ask: ‘Hu nao talem olsem?’

Esther hem sei: ‘Enemy bilong mifala hem datfala nogud man, Ha′man!’

Queen Esther accusim Haman

So king hem kros fogud nao. Hem givim komand for olketa killim dae Ha′man. Bihaen, king hem mekem Mor′de‧cai kamap main bigman bilong hem. So Mor′de‧cai mekem kamap wanfala niu law wea letem olketa Israelite for faet for sevem laef bilong olketa long day wea first law sei olketa mas dae. From Mor′de‧cai kamap wanfala barava important man, plande pipol helpem olketa Israelite, and olketa sev from olketa enemy bilong olketa.

Bible buk bilong Esther.



Olketa Kwestin

  • Hu nao Mordecai and Esther?
  • Why nao King Ahasuerus laek garem wanfala niu waef, and hu nao hem chusim?
  • Hu nao Haman, and wanem nao mekem hem barava kros?
  • Wanem nao datfala law wea king hem mekem, and wanem nao Esther duim bihaen hem kasem wanfala message from Mordecai?
  • Wanem nao happen long Haman, and wanem nao happen long Mordecai?
  • Hao nao olketa Israelite sev from enemy bilong olketa?

Samfala extra kwestin

  • Readim Esther 2:12-18.

    Hao nao Esther showimaot wei wea “kwaet and hambol fasin” hem gud tumas? (Esther 2:15; 1 Pet. 3:1-5)

  • Readim Esther 4:1-17.

    Long sem wei wea Esther kasem chance for duim samting for sapotim tru worship, wanem chance nao iumi kasem distaem for showimaot iumi loyal long Jehovah and lovem hem? (Esther 4:13, 14; Matt. 5:14-16; 24:14)

  • Readim Esther 7:1-6.

    Hao nao plande wea servem God distaem stap long danger for kasem persecution olsem Esther? (Esther 7:4; Matt. 10:16-22; 1 Pet. 2:12)