Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 81: Trustim Help From God

Story 81: Trustim Help From God

KLOSAP 50,000 pipol nao lusim Babylon and wakabaot go bak long Jerusalem. Bat taem olketa kasem long there, evri samting nogud nao. No eniwan stap long there. Olketa Israelite mas wakem evri samting moa.

Wanfala first samting wea olketa wakem hem wanfala altar. Diswan hem ples wea olketa savve givim olketa animal olsem sakrifaes, or present, long Jehovah. Tu-thri month bihaen, olketa Israelite start for buildim temple. Bat olketa enemy wea stap klosap no wantem olketa Israelite for buildim datwan. So olketa trae for mekem olketa fraet for stopem olketa. Gogo, olketa enemy hia mekem niufala king bilong Persia for mekem wanfala law for stopem datfala waka.

Plande year go pas. Seventin year bihaen taem olketa kasem bak long Jerusalem, Jehovah sendem tufala profet bilong hem Hag′gai and Zech‧a‧ri′ah for talem olketa pipol for startim datfala building waka. Olketa pipol trustim help bilong God, and olketa obeyim olketa profet. Olketa start for build moa, nomata wanfala law sei olketa mas no duim datwan.

So wanfala bigman bilong Persia, Tat′te‧nai, kam and askem olketa Israelite hu nao talem olketa for buildim temple. Olketa Israelite talem hem hao taem olketa stap long Babylon, King Cy′rus sei long olketa: ‘Go long Jerusalem and buildim temple bilong God bilong iufala, Jehovah.’

Tat′te‧nai sendem wanfala leta go long Babylon and askem sapos Cy′rus, wea dae finis, hem really talem datwan. No longtaem bihaen, wanfala leta from niufala king bilong Persia hem kam bak. Leta hia sei Cy′rus hem barava talem datfala toktok. So king hem raet olsem: ‘Letem olketa Israelite buildim temple bilong God bilong olketa. And mi komandim iu for helpem olketa.’ Insaed long fofala year, temple hem finis and olketa Israelite hapi fogud.

Plande year moa go pas. Klosap 48 year bihaen olketa buildim finis datfala temple, pipol long Jerusalem olketa poor, and datfala taon and temple bilong God no mas luk gud. Long Babylon, wanfala Israelite, Ez′ra, hem herem need for fixim temple bilong God. So, waswe, iu savve wanem nao hem duim?

Ez′ra go for lukim Ar‧ta‧xerx′es, king bilong Persia, and disfala gud king givim Ez′ra plande present for tekem go long Jerusalem. Ez′ra askem olketa Israelite long Babylon for helpem hem karem olketa present hia long Jerusalem. Samting olsem 6,000 pipol sei olketa bae go. Olketa garem plande silver and gold and nara samting wea kost tumas for tekem witim olketa.

Ez′ra hem wari, from plande nogud man stap long road wea olketa bae followim. Olketa man hia maet tekem silver and gold bilong olketa, and killim olketa dae tu. So Ez′ra hipimap olketa pipol, olsem iu savve lukim long piksa. Then olketa prea long Jehovah for protectim olketa long longfala wakabaot bilong olketa for go bak long Jerusalem.

Ezra and olketa pipol prea

Jehovah hem protectim olketa. And bihaen olketa wakabaot for fofala month, olketa kasem Jerusalem. Diswan showimaot hao Jehovah savve protectim olketa wea trustim hem for helpem olketa.

Ezra chapter 2 go kasem 8.



Olketa Kwestin

  • Haomas pipol go long datfala wakabaot from Babylon go kasem Jerusalem, bat wanem nao olketa lukim taem olketa arrive?
  • Bihaen olketa arrive, wanem nao olketa Israelite start for buildim, bat wanem nao olketa enemy duim?
  • Hu nao Haggai and Zechariah, and olketa talem olketa pipol for duim wanem?
  • Why nao Tattenai sendem wanfala leta long Babylon, and wanem nao ansa wea hem kasem?
  • Wanem nao Ezra duim taem hem savve olketa need for fixim temple bilong God?
  • Wanem nao Ezra prea for hem insaed long piksa, hao nao datfala prea kasem ansa, and wanem nao iumi lanem from diswan?

Samfala extra kwestin

  • Readim Ezra 3:1-13.

    Sapos enitaem iumi stap long ples wea no garem eni kongregeson bilong pipol bilong God, wanem nao iumi shud gohed for duim? (Ezra 3:3, 6; Acts 17:16, 17; Heb. 13:15)

  • Readim Ezra 4:1-7.

    Wanem example nao Zerubbabel showimaot for pipol bilong Jehovah saed long wei for no join witim olketa nara religion? (Ex. 34:12; 1 Cor. 15:33; 2 Cor. 6:14-17)

  • Readim Ezra 5:1-5, 17 and 6:1-22.

    Why nao olketa wea againstim waka for buildim temple no savve stopem datfala waka? (Ezra 5:5; Isa. 54:17)

    Hao nao samting wea olketa older man bilong olketa Jew duim hem encouragem olketa Christian elder for lukaotem direction bilong Jehovah taem olketa deal witim olketa wea againstim iumi? (Ezra 6:14; Ps. 32:8; Rom. 8:31; Jas. 1:5)

  • Readim Ezra 8:21-23, 28-36.

    Bifor iumi start for duim wanfala samting, hem gud for iumi followim wanem example bilong Ezra? (Ezra 8:23; Ps. 127:1; Prov. 10:22; Jas. 4:13-15)