Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 80: Pipol Bilong God Lusim Babylon

Story 80: Pipol Bilong God Lusim Babylon

KLOSAP tufala year go pas from taem wea olketa long Media and Persia tekovarem Babylon. And lukim samting wea happen distaem! Olketa Israelite lusim Babylon. Hao nao olketa go free? Hu nao letem olketa for go?

Cy′rus, king bilong Persia nao duim diswan. Longfala taem bifor Cy′rus hem born, Jehovah mekem profet bilong hem Isaiah for raet olsem abaotem hem: ‘Iu bae barava duim samting wea mi wantem iu for duim. Olketa gate bae open for iu go tekovarem datfala taon.’ Tru nao, olsem Isaiah talem, Cy′rus nao hem lead for tekovarem Babylon. Olketa bilong Media and Persia kam insaed long datfala taon long naet thru long olketa gate wea open.

Bat profet bilong Jehovah, Isaiah, talem tu hao Cy′rus bae givim komand for olketa buildim moa Jerusalem and temple bilong hem. Waswe, Cy′rus givim datfala komand? Ia, hem duim olsem. Samting wea Cy′rus talem long olketa Israelite hem olsem: ‘Go, distaem, long Jerusalem and buildim temple bilong God bilong iufala, Jehovah.’ Hem nao samting olketa Israelite hia go for duim.

Olketa Israelite wea lusim Babylon

Bat no evri Israelite long Babylon savve wakabaot go bak long Jerusalem. Hem longfala wakabaot bilong samting olsem 800 kilometer and plande long olketa olo or sik tumas for wakabaot farawe olsem. And olketa nara samting tu mekem samfala pipol no go. Bat Cy′rus talem olketa wea no go: ‘Givim silver and gold and olketa nara present long pipol wea go bak for buildim moa Jerusalem and temple bilong hem.’

So, olketa givim plande present long olketa Israelite hia wea go bak long Jerusalem. And tu, Cy′rus givim olketa dish and kap wea King Neb‧u‧chad‧nez′zar hem tekem from temple bilong Jehovah taem hem finisim Jerusalem. Olketa pipol garem plande samting for karem go bak.

Bihaen fofala month wea olketa wakabaot, olketa Israelite kasem Jerusalem long barava taem. Hem 70 year nao from taem wea datfala ples hem finis evribit, and no eniwan stap long there. Bat nomata olketa Israelite kam bak long kantri bilong olketa seleva, olketa bae kasem samfala hard taem, olsem iumi bae lukim.

Isaiah 44:28; 45:1-4; Ezra 1:1-11.



Olketa Kwestin

  • Olsem piksa hem showimaot, wanem nao olketa Israelite duim?
  • Hao nao Cyrus fulfillim profesi wea Jehovah givim thru long Isaiah?
  • Wanem nao Cyrus talem olketa Israelite wea no savve go bak long Jerusalem?
  • Wanem nao Cyrus givim long olketa pipol for tekem go bak long Jerusalem?
  • Haomas month nao olketa Israelite wakabaot for kasem Jerusalem?
  • Haomas year nao go pas finis from taem wea no eniwan stap long datfala land?

Samfala extra kwestin

  • Readim Isaiah 44:28 and 45:1-4.

    Hao nao Jehovah strongim hao datfala profesi abaotem Cyrus bae barava fulfill? (Isa. 55:10, 11; Rom. 4:17)

    Profesi bilong Isaiah abaotem Cyrus showimaot wanem samting abaotem savve bilong Jehovah God for talem firstaem samting wea bae happen long future? (Isa. 42:9; 45:21; 46:10, 11; 2 Pet. 1:20)

  • Readim Ezra 1:1-11.

    Hao nao iumi savve followim example bilong olketa wea no savve go bak long Jerusalem, saed long wei for ‘strongim hand’ bilong olketa wea insaed full-taem service? (Ezra 1:4, 6; Rom. 12:13; Col. 4:12)