Wanfala hand hem raet long wall

WANEM nao happen long hia? Olketa pipol enjoyim bigfala kaikai. King bilong Babylon invaetem plande thousand important man. Olketa iusim olketa gold and silver kap and dish from temple bilong Jehovah long Jerusalem. Bat, seknomoa, finger bilong wanfala hand hem kamap and start for raet long wall. Evriwan fraet fogud.

Belshazzar and olketa wea hem invaetem

Distaem, Bel‧shaz′zar, granpikinini bilong Neb‧u‧chad‧nez′zar, hem king. Hem singaot long olketa wise man bilong hem for kam. King hem sei: ‘Eniwan wea savve readim disfala raeting and minim long mi bae mi givim hem plande present and hem bae kamap mek-thri important ruler long disfala kingdom.’ Bat no eni wise man savve readim raeting long wall, or talem mining bilong hem.

Mami bilong king herem disfala noise and kam long bigfala rum wea olketa kaikai. Hem sei long king: ‘Plis no fraet tumas. Wanfala man long kingdom bilong iu hem savve long olketa holy god. Taem grandadi bilong iu Neb‧u‧chad‧nez′zar hem king, hem mekem hem chief bilong evri wise man bilong hem. Nem bilong hem Daniel. Askem hem for kam, and hem bae talem iu wanem nao mining bilong diswan.’

So stretawe olketa tekem kam Daniel. Hem rejectim olketa present wea olketa laek givim long hem, and then hem talem why nao Jehovah aotem grandadi bilong Bel‧shaz′zar, Neb‧u‧chad‧nez′zar olsem king. Daniel hem sei: ‘Hem praod fogud and Jehovah panisim hem.’

Daniel talem Bel‧shaz′zar: ‘Bat nomata iu savve long evri samting wea happen long Neb‧u‧chad‧nez′zar, iu barava praod olsem hem. Iu tekem olketa kap and dish from temple bilong Jehovah and drink from olketa. Iu praisem olketa god bilong timba and ston, and iu nating honorim Nambawan Creator bilong iumi. Dastawe God sendem datfala hand for raetem olketa toktok hia.’

Daniel hem sei moa: ‘Diswan nao samting wea hem raetem, ME′NE, ME′NE, TE′KEL and PAR′SIN.’

‘ME′NE minim God hem markem namba bilong olketa day for iu rul and hem finis nao. TE′KEL minim hem weim iu long scale and faendem hao iu nating gud. PAR′SIN minim hem givim kingdom bilong iu long olketa bilong Media and Persia.’

Taem Daniel hem toktok yet, olketa bilong Media and Persia start for attakim Babylon. Olketa tekova long datfala taon and killim dae Bel‧shaz′zar. Raeting long wall hem kamap tru long datfala sem naet! Bat wanem nao bae happen long olketa Israelite? Bae iumi faendaot, bat firstaem iumi bae lukim samting wea happen long Daniel.

Daniel 5:1-31.



Olketa Kwestin

  • Wanem nao happen taem king bilong Babylon mekem bigfala feast and hem iusim olketa kap and dish wea olketa tekem from temple bilong Jehovah long Jerusalem?
  • Wanem nao Belshazzar sei long olketa wise man bilong hem, bat olketa no savve duim wanem?
  • Mami bilong king talem hem for duim wanem samting?
  • Olsem Daniel talem long king, why nao God mekem datfala hand for raet long wall?
  • Hao nao Daniel explainim mining bilong datfala raeting long wall?
  • Taem Daniel gohed for story, wanem nao hem happen?

Samfala extra kwestin

  • Readim Daniel 5:1-31.

    Markem fasin for fraet long God witim fraet bilong Belshazzar taem hem lukim datfala raeting long wall. (Dan. 5:6, 7; Ps. 19:9; Rom. 8:35-39)

    Hao nao Daniel barava showimaot fasin for no fraet taem hem story long Belshazzar and olketa bigman bilong hem? (Dan. 5:17, 18, 22, 26-28; Acts 4:29)

    Hao nao Daniel chapter 5 strongim wei wea Jehovah hem sovereign bilong universe? (Dan. 4:17, 25; 5:21)