Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 76: Jerusalem Hem Finis Evribit

Story 76: Jerusalem Hem Finis Evribit

HEM winim 10 year finis from taem wea King Neb‧u‧chad‧nez′zar tekem evri Israelite wea skul gud go long Babylon. And lukim samting wea happen! Jerusalem hem bone. And olketa tekem olketa Israelite wea no dae go long Babylon olsem olketa prisoner.

Remember, diswan nao samting wea olketa profet bilong Jehovah olketa warnim bae happen sapos olketa pipol no changem nogud wei bilong olketa. Bat olketa Israelite no lisin long olketa profet. Olketa gohed for worshipim olketa giaman god and no Jehovah. So olketa pipol hia fit for kasem panis. Iumi savve long diswan from profet bilong God, Ezekiel, talem iumi abaotem olketa nogud samting wea olketa Israelite duim.

Waswe, iu savve hu nao Ezekiel? Hem wanfala young man wea King Neb‧u‧chad‧nez′zar tekem go long Babylon winim 10-fala year bifor Jerusalem hem finis evribit. Daniel and thrifala fren bilong hem, Sha′drach, Me′shach and A‧bed′ne‧go, olketa tu go long Babylon long semtaem.

Nomata Ezekiel hem stap long Babylon, Jehovah showim hem olketa nogud samting wea gohed for happen long Jerusalem long temple. Jehovah iusim wanfala mirakol for duim diswan. Ezekiel hem stap yet long Babylon, bat Jehovah letem hem for lukim evri samting wea gohed for happen long temple. And samting wea Ezekiel lukim hem nogud tumas!

Jehovah hem sei long Ezekiel: ‘Lukim olketa nogud samting wea pipol duim long temple. Lukim olketa wall wea fulap witim piksa bilong olketa snek and narafala animal. And lukim olketa Israelite worshipim olketa!’ Ezekiel savve lukim olketa samting hia, and hem raetem daon samting wea happen.

Olketa prisoner go aot from Jerusalem

Jehovah askem Ezekiel: ‘Waswe, iu lukim samting wea olketa Israelite leader duim haed?’ Ia, hem lukim diswan tu. Seventi man nao stap, and evriwan worshipim olketa giaman god. Olketa sei: ‘Jehovah hem no lukim iumi. Hem lusim disfala land finis.’

Then Jehovah showim Ezekiel samfala woman long north gate bilong temple. Olketa sidaon and worshipim false god Tam′muz. And lukim olketa man long front bilong temple bilong Jehovah! Samting olsem 25 man nao stap. Ezekiel lukim olketa. Olketa feisim east and olketa baodaon and worshipim sun!

Jehovah hem sei: ‘Olketa pipol hia nating respectim mi. Olketa duim olketa nogud samting nomata insaed long temple bilong mi tu!’ So Jehovah promis olsem: ‘Olketa bae feelim strong bilong kros bilong mi. And mi bae no sorre long olketa taem olketa finis evribit.’

Thrifala year bihaen Jehovah showim olketa samting hia long Ezekiel, olketa Israelite go againstim King Neb‧u‧chad‧nez′zar. So hem go and faet againstim olketa. Bihaen wan and haf year, olketa bilong Babylon brekem olketa wall bilong Jerusalem and bonem datfala taon evribit. Plande pipol dae or go olsem prisoner long Babylon.

Why nao Jehovah letem disfala nogud wei for finisim evri samting olsem happen long olketa Israelite? Bikos olketa no lisin long Jehovah and no obeyim olketa law bilong hem. Diswan showimaot wei wea hem barava important for iumi evritaem duim samting wea God talem.

Firstaem, olketa letem samfala pipol stap long land bilong Israel. King Neb‧u‧chad‧nez′zar putim wanfala Jew wea nem bilong hem Ged‧a‧li′ah for lukaftarem olketa pipol hia. Bat then samfala Israelite killim dae Ged‧a‧li′ah. So olketa pipol hia fraet nogud olketa long Babylon bae kam and killim dae evriwan from disfala nogud samting wea happen. So olketa forcem Jeremiah for go witim olketa, and olketa ranawe go long Egypt.

Diswan mekem no eniwan stap long land bilong Israel. For 70 year no eniwan stap long disfala land. Hem emti evribit. Bat Jehovah promis for bringim bak pipol bilong hem long datfala land bihaen 70 year. Bat wanem nao happen long pipol bilong God long land bilong Babylon wea olketa stap? Iumi lukim.

2 Kings 25:1-26; Jeremiah 29:10; Ezekiel 1:1-3; 8:1-18.



Olketa Kwestin

  • Olsem piksa hem showim, wanem nao happen long Jerusalem and olketa Israelite?
  • Hu nao Ezekiel, and wanem nao olketa nogud samting wea Jehovah showim long hem?
  • From olketa Israelite nating respectim Jehovah, hem talem wanem promis?
  • Wanem nao King Nebuchadnezzar duim bihaen olketa Israelite againstim hem?
  • Why nao Jehovah letem disfala nogud wei for finisim evri samting kasem olketa Israelite?
  • Wanem nao mekem no eni man stap long land bilong Israel, and for haomas year nao hem olsem?

Samfala extra kwestin

  • Readim 2 Kings 25:1-26.

    Hu nao Zedekiah, wanem nao happen long hem, and hao nao diswan fulfillim Bible profesi? (2 Ki. 25:5-7; Ezek. 12:13-15)

    Jehovah blamem hu nao for evri samting wea Israel duim wea showimaot olketa no garem faith? (2 Ki. 25:9, 11, 12, 18, 19; 2 Chron. 36:14, 17)

  • Readim Ezekiel 8:1-18.

    Hao nao olketa false Christian religion duim sem samting olsem olketa apostate Israelite wea worshipim sun? (Ezek. 8:16; Isa. 5:20, 21; John 3:19-21; 2 Tim. 4:3)