Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 74: Man wea Nating Fraet

Story 74: Man wea Nating Fraet

LUKIM olketa pipol hia wea mekfani long disfala young man. Waswe, iu savve hu nao hem? Hem Jeremiah. Hem wanfala barava important profet bilong God.

Pipol wea mekfani long Jeremiah

No longtaem bihaen King Jo‧si′ah start for finisim evribit olketa idol from datfala land, Jehovah talem Jeremiah for kamap profet bilong Hem. Bat, Jeremiah tingse hem young tumas for kamap wanfala profet. Bat Jehovah sei Hem bae helpem hem.

Jeremiah talem olketa Israelite for finis for duim nogud samting. Hem sei: ‘Olketa god wea pipol bilong olketa nation worshipim olketa giaman.’ Bat plande Israelite want for worshipim olketa idol winim wei for worshipim trufala God Jehovah. Taem Jeremiah talem pipol hao God bae panisim olketa from nogud fasin bilong olketa, olketa laf nomoa.

Plande year go pas. Jo‧si′ah hem dae, and thrifala month bihaen, son bilong hem Je‧hoi′a‧kim kamap king. Jeremiah gohed for talem olketa pipol: ‘Jerusalem bae finis sapos iufala no changem olketa nogud wei bilong iufala.’ Olketa priest kasholem Jeremiah and singaot: ‘Iu fit for dae from samting wea iu talem.’ Then olketa talem olketa prince bilong Israel: ‘Jeremiah mas dae, bikos hem talem samting againstim taon bilong iumi.’

Wanem nao Jeremiah bae duim? Hem nating fraet! Hem sei long olketa: ‘Jehovah talem mi for talem olketa samting hia long iufala. Sapos iufala no changem olketa nogud wei bilong iufala, Jehovah bae finisim Jerusalem evribit. Bat iufala mas savve long diswan: Sapos iufala killim mi dae, iufala killim dae man wea no duim eni rong samting.’

Olketa prince letem Jeremiah for stap laef, bat olketa Israelite no changem olketa nogud wei bilong olketa. Bihaen Neb‧u‧chad‧nez′zar, king bilong Babylon, kam and faet againstim Jerusalem. Gogo Neb‧u‧chad‧nez′zar mekem olketa Israelite kamap servant bilong hem. Hem tekem plande thousand long olketa go long Babylon. Bae hem nogud tumas sapos olketa stranger tekem iu go long difren kantri and keepim iu olsem prisoner, iaman?

Jeremiah 1:1-8; 10:1-5; 26:1-16; 2 Kings 24:1-17.



Olketa Kwestin

  • Hu nao young man insaed long piksa?
  • Wanem nao tingting bilong Jeremiah abaotem wei wea hem kamap wanfala profet, bat wanem nao Jehovah sei long hem?
  • Wanem nao message wea Jeremiah gohed talem olketa pipol?
  • Hao nao olketa priest trae for stopem Jeremiah, bat hao nao hem showimaot hem no fraet?
  • Wanem nao happen taem olketa Israelite no changem nogud wei bilong olketa?

Samfala extra kwestin

  • Readim Jeremiah 1:1-8.

    Olsem example bilong Jeremiah showimaot, wanem nao mekem wanfala man fit for servem Jehovah? (2 Cor. 3:5, 6)

    Hao nao example bilong Jeremiah hem encouragem olketa young Christian distaem? (Eccl. 12:1; 1 Tim. 4:12)

  • Readim Jeremiah 10:1-5.

    Wanem example nao Jeremiah storyim wea barava showimaot hem iusles for trustim olketa idol? (Jer. 10:5; Isa. 46:7; Hab. 2:19)

  • Readim Jeremiah 26:1-16.

    Taem anointed remnant talemaot warning message distaem, hao nao olketa barava followim komand wea Jehovah givim long Jeremiah for ‘no aotem eni word’? (Jer. 26:2; Deut. 4:2; Acts 20:27)

    Jeremiah showimaot wanem gudfala example for Olketa Jehovah’s Witness distaem saed long wei for talemaot warning bilong Jehovah for olketa nation? (Jer. 26:8, 12, 14, 15; 2 Tim. 4:1-5)

  • Readim 2 Kings 24:1-17.

    Wanem sorre samting nao kamaot from wei wea Judah no faithful long Jehovah? (2 Ki. 24:2-4, 14)