Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 70: Jonah and Datfala Big Fish

Story 70: Jonah and Datfala Big Fish

LUKIM disfala man insaed long sea. Hem kasem bigfala trabol nao, iaman? Datfala fish redi for swallowim hem! Iu savve hu nao disfala man? Nem bilong hem Jo′nah. Why nao hem insaed bigfala trabol hia?

Jo′nah hem wanfala profet bilong Jehovah. No longtaem bihaen profet E‧li′sha hem dae, Jehovah sei olsem long Jo′nah: ‘Go long bigfala taon bilong Nin′e‧veh. Nogud fasin bilong pipol long there hem big tumas, and mi wantem iu for tok long olketa abaotem diswan.’

Jonah and datfala big fish

Bat Jo′nah no want for go. So hem go insaed wanfala ship wea bae go long ples wea farawe from Nin′e‧veh. Jehovah hem no hapi long Jo′nah from hem ranawe olsem. So Hem mekem wanfala big wind kamap. Wind hem big fogud and luk olsem ship maet sink daon nao. Olketa man wea waka long ship olketa fraet fogud, and singaot for god bilong olketa helpem olketa.

Gogo Jo′nah talem olketa: ‘Mi worshipim Jehovah, God wea wakem skae and earth. And mi ranawe from samting wea Jehovah talem mi for duim.’ So olketa askem hem: ‘Wanem nao mifala shud duim long iu for stopem disfala big wind?’

Jo′nah hem sei: ‘Torowem mi go insaed long sea, and sea bae kwaet moa.’ Olketa man hia no want for duim diswan, bat taem big wind hia hem kamap moa worse olketa torowem go Jo′nah long sea. Stretawe big wind hia hem finis, and sea hem kwaet moa.

Taem Jo′nah sink go daon insaed long wata, bigfala fish hia swallowim hem. Bat hem no dae. For thrifala day and thrifala naet hem stap insaed long bele bilong fish. Jo′nah hem sorre tumas from hem no obeyim Jehovah and go long Nin′e‧veh. So waswe, iu savve wanem nao hem duim?

Jo′nah prea long Jehovah for helpem hem. Then Jehovah mekem disfala fish toroaotem Jo′nah long drae ples. Bihaen, Jo′nah hem go long Nin′e‧veh. Diswan teachim iumi hao hem important tumas for iumi duim samting wea Jehovah talem, iaman?

Bible buk bilong Jonah.



Olketa Kwestin

  • Hu nao Jonah, and wanem nao Jehovah talem hem for duim?
  • From hem no want for go long ples wea Jehovah talem hem for go long hem, wanem nao Jonah hem duim?
  • Wanem nao Jonah talem olketa sailor for duim for stopem datfala big wind?
  • Olsem iu savve lukim long piksa, wanem nao happen taem Jonah sink go daon insaed long wata?
  • Haomas day and naet nao Jonah stap insaed bele bilong bigfala fish, and wanem nao hem duim taem hem stap long there?
  • Bihaen hem kamaot from bigfala fish, wea nao Jonah hem go, and wanem nao iumi lanem from diswan?

Samfala extra kwestin

  • Readim Jonah 1:1-17.

    Luk olsem Jonah hem feel hao abaotem assignment bilong hem for preach long pipol bilong Nineveh? (Jonah 1:2, 3; Prov. 3:7; Eccl. 8:12)

  • Readim Jonah 2:1, 2, 10.

    Hao nao samting wea kasem Jonah mekem iumi feel sure Jehovah bae ansarem olketa prea bilong iumi? (Ps. 22:24; 34:6; 1 John 5:14)

  • Readim Jonah 3:1-10.

    Hao nao hem encouragem iumi for savve Jehovah gohed iusim Jonah nomata hem fail firstaem for fulfillim assignment bilong hem? (Ps. 103:14; 1 Pet. 5:10)

    Wanem nao experience bilong Jonah witim pipol bilong Nineveh hem teachim iumi abaotem wei for no judgem pipol long territory bilong iumi? (Jonah 3:6-9; Eccl. 11:6; Acts 13:48)