Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 69: Gele Helpem Wanfala Bigman

Story 69: Gele Helpem Wanfala Bigman

WASWE, iu savve wanem nao disfala smol gele hem talem? Hem talem woman hia abaotem profet bilong Jehovah, E‧li′sha, and olketa nambawan samting wea Jehovah helpem hem for duim. Woman hia no savve long Jehovah from hem no wanfala Israelite. So why nao gele hem stap long haos bilong disfala woman?

Disfala woman hem from Syria. Hasband bilong hem Na′a‧man, bigman long army bilong Syria. Olketa bilong Syria kasholem disfala smol Israelite gele, and tekem hem for kamap servant bilong waef bilong Na′a‧man.

Waef bilong Naaman and servant gele bilong hem

Na′a‧man garem wanfala nogud sik, leprosy. Disfala sik savve kaikaim samfala part bilong body. So disfala gele sei olsem long waef bilong Na′a‧man: ‘Hem bae gud tumas sapos masta bilong mi go long profet bilong Jehovah long Israel. Hem bae healim leprosy bilong hem.’ Bihaen, olketa talem diswan long hasband bilong disfala woman.

Na′a‧man laekem tumas for kasem healing; so hem disaed for go long Israel. Taem hem kasem long there, hem go long haos bilong E‧li′sha. E‧li′sha talem servant bilong hem for go and talem Na′a‧man for go swim long Jordan River sevenfala taem. Diswan mekem Na′a‧man kros fogud, and hem sei: ‘Olketa river long hom olketa moabeta winim eni river long Israel!’ Bihaen hem tok olsem, hem go nao.

Bat wanfala servant bilong hem sei: ‘Sir, sapos E‧li′sha talem iu for duim hardfala samting, iu bae duim. So why nao iu no swimim iuseleva, olsem hem talem?’ Na′a‧man lisin long servant and hem go and swim long Jordan River sevenfala taem. Taem hem duim diswan, body bilong hem kamap strong and healthy!

Na′a‧man hem hapi tumas. Hem go bak long E‧li′sha and talem hem: ‘Distaem mi barava savve hao God long Israel hem nomoa only tru God long full earth. So, plis, tekem disfala present from mi.’ Bat E‧li′sha ansa olsem: ‘Nomoa, mi bae no tekem.’ E‧li′sha savve bae hem rong sapos hem tekem datfala present, bikos Jehovah nao healim Na′a‧man. Bat servant bilong E‧li′sha, Ge‧ha′zi, wantem datfala present for hemseleva.

So wanem nao Ge‧ha′zi duim? Bihaen Na′a‧man hem go, Ge‧ha′zi ran bihaenem hem, and hem sei: ‘E‧li′sha sendem mi for talem iu hem laekem samfala present from iu for samfala fren wea just kam for visit.’ Diswan hem wanfala laea story. Bat Na′a‧man no savve hem laea; so hem givim Ge‧ha′zi samfala samting.

Taem Ge‧ha′zi go bak long hom, E‧li′sha savve long samting wea hem duim. Jehovah talem hem finis. So hem sei: ‘From iu duim disfala nogud samting, leprosy bilong Na′a‧man bae kasem iu.’ And stretawe, diswan kasem hem!

Wanem nao iumi savve lanem from evri samting hia? First samting, iumi shud olsem smolfala gele hia and tok abaotem Jehovah. Gudfala samting savve kamaot from datwan. Mek-tu samting, iumi mas no praod olsem Na′a‧man long firstaem, bat iumi mas obeyim olketa servant bilong God. And mek-thri, iumi mas no laea olsem Ge‧ha′zi. Iumi savve lanem plande samting taem iumi readim Bible, iaman?

2 Kings 5:1-27.



Olketa Kwestin

  • Insaed long piksa, wanem nao datfala smol gele talem long datfala woman?
  • Hu nao datfala woman insaed long piksa, and why nao datfala smol gele stap long haos bilong hem?
  • Wanem nao Elisha talem servant bilong hem for go talem Naaman, and why nao Naaman hem kamap kros?
  • Wanem nao happen taem Naaman duim samting wea olketa servant bilong hem talem?
  • Why nao Elisha nating willing for acceptim present bilong Naaman, bat wanem nao Gehazi hem duim?
  • Wanem nao happen long Gehazi, and wanem nao iumi savve lanem from diswan?

Samfala extra kwestin

  • Readim 2 Kings 5:1-27.

    Hao nao example bilong datfala smol Israelite gele savve encouragem olketa young wan distaem? (2 Ki. 5:3; Ps. 8:2; 148:12, 13)

    Why nao hem gud for tingim example bilong Naaman taem iumi kasem kaonsel from Bible? (2 Ki. 5:15; Heb. 12:5, 6; Jas. 4:6)

    Wanem nao iumi savve lanem taem iumi markem example bilong Elisha witim example bilong Gehazi? (2 Ki. 5:9, 10, 14-16, 20; Matt. 10:8; Acts 5:1-5; 2 Cor. 2:17)