Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 68: Tufala Boy wea Laef Bak Moa

Story 68: Tufala Boy wea Laef Bak Moa

SAPOS iu dae, hao nao mami bilong iu bae feel sapos iu laef bak moa? Hem bae hapi fogud! Bat, waswe, man wea dae finis savve laef bak moa? Waswe, enitaem diswan happen bifor?

Lukim man long hia, and datfala woman and smolfala boy. Disfala man hem profet E‧li′jah. Woman hia hem wanfala widow woman bilong Zar′e‧phath, and disfala boy hem son bilong hem. Wanday disfala boy hem sik. Hem kamap sik fogud and gogo hem dae. So E‧li′jah talem disfala woman: ‘Givim boy hia long mi.’

Elijah witim wanfala widow woman and son bilong hem wea laef bak

E‧li′jah tekem disfala pikinini wea dae long rum antap and putim hem long bed. Then hem prea olsem: ‘O Jehovah, mekem disfala boy laef bak moa.’ And boy hia start for brith nao! So E‧li′jah tekem hem go daon long haos and sei long disfala woman: ‘Lukim, son bilong iu hem laef bak!’ Dastawe mami bilong hem hapi fogud.

Narafala important profet bilong Jehovah hem E‧li′sha. Hem helpem E‧li′jah. Jehovah iusim E‧li′sha tu for duim olketa mirakol. Wanday E‧li′sha go long taon bilong Shu′nem, wea wanfala woman hem kaen long hem. Bihaen, disfala woman garem wanfala baby boy.

Wanfala morning, taem pikinini hia hem big lelebet, hem go for waka witim dadi bilong hem. Seknomoa, boy hia hem singaot: ‘Hed bilong mi hem soa!’ Taem olketa tekem hem go long haos, boy hem dae. Mami bilong hem sorre fogud! Stretawe hem go for kolem kam E‧li′sha.

Taem E‧li′sha kasem long there, hem go insaed long rum wea pikinini wea dae hem stap. Hem prea long Jehovah, and leidaon antap long body hia. No longtaem body bilong boy hia kamap hot, and hem kof sevenfala taem. Mami bilong boy hia hapi tumas taem hem kam insaed long rum and boy bilong hem laef bak!

Staka pipol dae finis. Diswan mekem olketa famili and fren bilong olketa feel sorre tumas. Iumi no savve mekem olketa wea dae finis for laef bak. Bat Jehovah hem savve duim. Iumi bae lanem bihaen hao hem bae mekem plande million pipol for laef bak moa.

1 Kings 17:8-24; 2 Kings 4:8-37.


Olketa Kwestin

  • Hu nao thrifala insaed long piksa, and wanem nao happen long datfala smol boy?
  • Elijah hem prea for wanem saed long datfala boy, and wanem nao happen bihaen?
  • Hu nao nem bilong man wea helpem Elijah?
  • Why nao Elisha go long haos bilong wanfala woman long Shunem?
  • Wanem nao Elisha duim, and wanem nao happen long datfala pikinini wea dae?
  • Jehovah garem paoa for duim wanem samting, olsem Elijah and Elisha showimaot?

Samfala extra kwestin

  • Readim 1 Kings 17:8-24.

    Hao nao fasin for obey and faith bilong Elijah kasem test? (1 Ki. 17:9; 19:1-4, 10)

    Wanem nao showimaot datfala widow woman bilong Zarephath garem strongfala faith? (1 Ki. 17:12-16; Luke 4:25, 26)

    Hao nao samting wea kasem datfala widow woman bilong Zarephath pruvim hao toktok bilong Jesus long Matthew 10:41, 42 hem barava tru? (1 Ki. 17:10-12, 17, 23, 24)

  • Readim 2 Kings 4:8-37.

    Wanem nao iumi savve lanem abaotem fasin for showimaot welkam from datfala woman bilong Shunem? (2 Ki. 4:8; Luke 6:38; Rom. 12:13; 1 John 3:17)

    Long olketa wanem wei nao iumi savve showimaot kaenfala fasin long olketa servant bilong God distaem? (Acts 20:35; 28:1, 2; Gal. 6:9, 10; Heb. 6:10)