Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 67: Jehoshaphat Trustim Jehovah

Story 67: Jehoshaphat Trustim Jehovah

WASWE, iu savve long olketa man hia and samting wea olketa duim? Olketa go for faet, and olketa man long front singsing. Bat maet iu ask: ‘Why nao olketa man wea singsing hia no garem olketa sword and spia for faet?’

Olketa Israelite march go for faet

Je‧hosh′a‧phat hem king bilong tu-tribe kingdom bilong Israel. Hem stap long semtaem olsem King A′hab and Jez′e‧bel bilong 10-tribe kingdom long north. Bat Je‧hosh′a‧phat hem gudfala king, and dadi bilong hem A′sa hem gudfala king tu. So for plande year olketa pipol long tu-tribe kingdom long south olketa enjoyim gudfala living.

Bat distaem wanfala samting hem happen wea mekem olketa pipol fraet. Olketa man for talemaot message kam and sei olsem long Je‧hosh′a‧phat: ‘Wanfala big army from olketa kantri bilong Mo′ab, Am′mon and Maunt Se′ir hem kam for attakim iu.’ Plande Israelite hipap long Jerusalem for askem help bilong Jehovah. Olketa go long temple, and long there Je‧hosh′a‧phat hem prea olsem: ‘O Jehovah, God bilong mifala, mifala no savve wanem for duim. Mifala no fit for againstim disfala big army. Mifala depend long iu for help.’

Jehovah hem herem diswan, and hem mekem wanfala servant bilong hem for talem olketa pipol: ‘Faet hem no bilong iufala, bat bilong God. Iufala bae no need for faet. Iufala bae lukluk nomoa, and lukim hao Jehovah bae sevem iufala.’

So long nextfala morning, Je‧hosh′a‧phat tok olsem long olketa pipol: ‘Trustim Jehovah!’ Then hem putim olketa man for singsing front long olketa soldia, and taem olketa march go olketa singim praise long Jehovah. Waswe, iu savve wanem nao happen taem olketa kam klosap long ples for faet? Jehovah hem mekem olketa enemy soldia for faetem olketa seleva. And taem olketa Israelite kasem long there, evri enemy soldia dae finis!

Je‧hosh′a‧phat hem barava wise for trustim Jehovah, iaman? Iumi bae wise sapos iumi trustim Hem tu.

1 Kings 22:41-53; 2 Chronicles 20:1-30.


Olketa Kwestin

  • Hu nao Jehoshaphat, and hem stap long wanem taem?
  • Why nao olketa Israelite fraet, and wanem nao staka long olketa duim?
  • Hao nao Jehovah ansarem prea bilong Jehoshaphat?
  • Jehovah mekem wanem samting for happen bifor datfala faet?
  • Wanem nao iumi savve lanem from Jehoshaphat?

Samfala extra kwestin

  • Readim 2 Chronicles 20:1-30.

    Hao nao samting wea Jehoshaphat duim hem example for olketa faithful servant bilong God taem olketa feisim olketa danger samting? (2 Chron. 20:12; Ps. 25:15; 62:1)

    From Jehovah evritaem deal witim pipol bilong hem thru long wanfala sekson wea story for hem, hu nao datfala sekson distaem? (2 Chron. 20:14, 15; Matt. 24:45-47; John 15:15)

    Taem God startim “war bilong bigfala day bilong God Olmaeti,” hao nao bae iumi olsem Jehoshaphat? (2 Chron. 20:15, 17; 32:8; Rev. 16:14, 16)

    Olsem olketa Levite, hao big nao share bilong olketa pioneer and missionary insaed disfala waka for preach evriwea long world distaem? (2 Chron. 20:19, 21; Rom. 10:13-15; 2 Tim. 4:2)