Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 66: Jezebel—Wanfala Nogud Queen

Story 66: Jezebel—Wanfala Nogud Queen

BIHAEN King Jer‧o‧bo′am hem dae, evri king wea rulim 10-tribe kingdom bilong Israel long north olketa nogud. King A′hab nao hem king wea worse winim evri nara king. Waswe, iu savve why? Bigfala reason nao hem waef bilong hem, datfala nogud Queen Jez′e‧bel.

Jez′e‧bel hem no Israelite woman. Hem dota bilong king bilong Si′don. Hem worshipim giaman god Ba′al, and hem mekem A′hab and plande Israelite tu for worshipim Ba′al. Jez′e‧bel heitim Jehovah and killim dae plande profet bilong hem. Olketa narawan mas haed insaed long olketa cave mekem hem no savve killim olketa dae. Sapos Jez′e‧bel laekem eni samting, hem bae killim man dae for kasem datwan.

Wanday King A′hab hem sorre fogud. So Jez′e‧bel askem hem: ‘Why nao iu sorre tuday?’

A′hab hem sei: ‘Bikos long samting wea Na′both hem talem mi. Mi want for baem grape plantation bilong hem. Bat hem sei mi no savve baem.’

Jez′e‧bel hem sei: ‘No wari, mi bae kasem for iu.’

So Jez′e‧bel hem raetem samfala leta long olketa chief long taon wea Na′both hem stap. Hem talem olketa: ‘Mekem samfala iusles man for sei Na′both cursim God and king. Then tekem Na′both go aot from taon and sutim hem witim ston go kasem taem hem dae.’

Taem Jez′e‧bel hem savve Na′both hem dae, hem sei long A′hab: ‘Go and tekem datfala grape plantation bilong hem.’ Waswe, iu tingse Jez′e‧bel hem fit for kasem panis for barava nogud samting wea hem duim?

Queen Jezebel

So, gogo, Jehovah sendem Je′hu for panisim hem. Taem Jez′e‧bel herem Je′hu hem kam, hem putim mek-ap long eye bilong hem and trae for mekem hemseleva luk naes. Bat taem Je′hu kam and lukim Jez′e‧bel long window, hem singaot go long olketa man insaed long haos bilong king: ‘Torowem hem go daon!’ Olketa man duim nao, olsem iu savve lukim long piksa. Olketa torowem hem go daon, and hem dae. Hem nao end bilong datfala nogud Queen Jez′e‧bel.

1 Kings 16:29-33; 18:1-4; 21:1-16; 2 Kings 9:30-37.



Olketa Kwestin

  • Hu nao Jezebel?
  • Why nao King Ahab hem feel sorre?
  • Wanem nao Jezebel duim for tekem grape garden bilong Naboth for hasband bilong hem, Ahab?
  • Hu nao Jehovah sendem for panisim Jezebel?
  • Olsem iu savve lukim long piksa, wanem nao happen taem Jehu arrive long haos bilong Jezebel?

Samfala extra kwestin

  • Readim 1 Kings 16:29-33 and 18:3, 4.

    Hao nao living bilong olketa Israelite long taem bilong King Ahab? (1 Ki. 14:9)

  • Readim 1 Kings 21:1-16.

    Hao nao Naboth showimaot fasin for no fraet and loyal fasin long Jehovah? (1 Ki. 21:1-3; Lev. 25:23-28)

    Wanem nao iumi savve lanem from example bilong Ahab abaotem wei for deal witim feel nogud? (1 Ki. 21:4; Rom. 5:3-5)

  • Readim 2 Kings 9:30-37.

    Wanem nao iumi savve lanem from wei wea Jehu strong for duim will bilong Jehovah? (2 Ki. 9:4-10; 2 Cor. 9:1, 2; 2 Tim. 4:2)