Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 65: Kingdom Hem Divaed

Story 65: Kingdom Hem Divaed

IU SAVVE why nao disfala man hem brekem kaleko bilong hem? Jehovah nao talem hem for duim olsem. Disfala man hem profet bilong God, A‧hi′jah. Waswe, iu savve wanem nao wanfala profet? Hem man wea God talem hem samting wea bae happen long future.

Ahijah and Jeroboam

Long hia A‧hi′jah hem story witim Jer‧o‧bo′am. Jer‧o‧bo′am hem wanfala man wea Solomon markem for duim samfala building waka bilong hem. Taem A‧hi′jah hem meetim Jer‧o‧bo′am long road, A‧hi′jah duim wanfala samting. Hem tekaotem niufala kaleko wea hem werem and brekem long 12-fala pis. Hem sei olsem long Jer‧o‧bo′am: ‘Tekem 10-fala pis for iuseleva.’ Waswe, iu savve why nao A‧hi′jah hem givim Jer‧o‧bo′am 10-fala pis?

A‧hi′jah hem talem hao Jehovah bae tekem kingdom from Solomon. Hem sei Jehovah bae givim 10-fala tribe long Jer‧o‧bo′am. Diswan minim tufala tribe nomoa bae stap for son bilong Solomon, Re‧ho‧bo′am, for rulim.

Taem Solomon herem samting wea A‧hi′jah talem long Jer‧o‧bo′am, hem barava kros fogud. Hem trae for killim dae Jer‧o‧bo′am. Bat Jer‧o‧bo′am ranawe go long Egypt. Bihaen, Solomon hem dae. Hem king for 40 year, bat then son bilong hem Re‧ho‧bo′am hem kamap king. Jer‧o‧bo′am wea stap long Egypt hem herem hao Solomon hem dae finis, so hem kam bak long Israel.

Re‧ho‧bo′am hem wanfala nogud king. Hem moa raf long pipol winim dadi bilong hem Solomon. Jer‧o‧bo′am and samfala nara important man olketa go long King Re‧ho‧bo′am and askem hem for showimaot kaenfala fasin long pipol. Bat Re‧ho‧bo′am no lisin. Hem barava kamap nogud winim bifor. So olketa pipol mekem Jer‧o‧bo′am kamap king ovarem 10-fala tribe, bat tufala tribe bilong Benjamin and Judah olketa keepim Re‧ho‧bo′am olsem king bilong olketa.

Jer‧o‧bo′am no wantem pipol bilong hem for go long Jerusalem for worship long temple bilong Jehovah. So hem mekem tufala gold buluka and mekem olketa pipol bilong 10-tribe kingdom for worshipim olketa. So land hia hem fulap witim nogud fasin and raf fasin.

Tu-tribe kingdom tu hem kasem trabol. Samfala year bihaen taem wea Re‧ho‧bo′am hem kamap king, king bilong Egypt hem kam for faet againstim Jerusalem. Hem tekem plande gudfala samting from temple bilong Jehovah. So for lelebet taem nomoa temple hem stap olsem taem wea olketa just buildim.

1 Kings 11:26-43; 12:1-33; 14:21-31.



Olketa Kwestin

  • Hu nao nem bilong tufala man long piksa, and hu nao olketa?
  • Wanem nao Ahijah duim witim niufala kaleko wea hem werem, and wanem nao mining bilong datwan?
  • Wanem nao Solomon trae for duim long Jeroboam?
  • Why nao olketa pipol mekem Jeroboam king ovarem tenfala tribe?
  • Why nao Jeroboam mekem tufala gold buluka, and wanem nao happen long datfala land no longtaem bihaen long datwan?
  • Wanem nao happen long datfala tu-tribe kingdom and long temple bilong Jehovah long Jerusalem?

Samfala extra kwestin

  • Readim 1 Kings 11:26-43.

    Jeroboam hem wanem kaen man, and wanem nao Jehovah promis for duim sapos hem gohed for obeyim olketa law bilong God? (1 Ki. 11:28, 38)

  • Readim 1 Kings 12:1-33.

    Nogud example bilong Rehoboam savve teachim parents and olketa elder wanem samting abaotem wei for iusim paoa wea olketa garem long rongfala wei? (1 Ki. 12:13; Eccl. 7:7; 1 Pet. 5:2, 3)

    Taem olketa young wan distaem mas disaedem olketa important samting long laef, olketa shud depend long hu nao for advaes? (1 Ki. 12:6, 7; Prov. 1:8, 9; 2 Tim. 3:16, 17; Heb. 13:7)

    Wanem nao muvim Jeroboam for markem tufala ples for worshipim buluka, and hao nao diswan showimaot hem barava no garem faith long Jehovah? (1 Ki. 11:37; 12:26-28)

    Hu nao wan wea leadim pipol long ten-tribe kingdom for againstim tru worship? (1 Ki. 12:32, 33)