Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 61: David Kamap King

Story 61: David Kamap King

SAUL hem trae moa for kasholem David. Hem tekem 3,000 best soldia bilong hem and go lukaotem hem. Taem David hem savve long diswan, hem sendem olketa spae for faendemaot wea nao Saul and olketa man bilong hem sleep long datfala naet. Then David askem tufala man bilong hem: ‘Hu nao bae go long camp bilong Saul witim mi?’

David singaot go long King Saul

A‧bish′ai hem sei: ‘Mi nao bae kam.’ A‧bish′ai hem son bilong sista bilong David, Ze‧ru′iah. Taem Saul and olketa man bilong hem sleep, David and A‧bish′ai creep go kwaet insaed long camp. Olketa tekem spia and botol wata bilong Saul, wea stap klosap long hed bilong hem. No eniwan lukim or herem olketa from olketa deepim sleep.

Lukim David and A‧bish′ai long hia. Olketa ranawe, and stap sef antap long wanfala hill. David hem shout go daon long army chief bilong Israel: ‘Ab′ner, why nao iu no protectim masta bilong iu, king? Lukim! Wea nao spia and wata botol bilong hem?’

Saul hem wekap. Hem heresavve voice bilong David, and hem ask: ‘Waswe, datwan hem iu, David?’ Waswe, iu savve lukim Saul and Ab′ner long daon?

David hem ansarem Saul olsem: ‘Ia, lord bilong mi king.’ Then David hem ask: ‘Why nao iu trae for kasholem mi? Wanem nogud samting nao mi duim? Spia bilong iu long hia, O king. Talem wanfala man bilong iu for kam and tekem.’

King Saul and Abner

Saul hem sei: ‘Mi nao rong, mi duim krangge samting.’ So David hem go, and Saul hem go bak long hom bilong hem. Bat David hem sei: ‘Masbi enitaem Saul bae killim mi dae. Mi mas ranawe go long land bilong olketa Phi‧lis′tine.’ And hem nao samting wea David duim. Hem trikim olketa Phi‧lis′tine and mekem olketa tingse hem saedem olketa.

Bihaen, olketa Phi‧lis′tine go for faet againstim Israel. Long datfala faet, Saul and Jon′a‧than dae. Diswan mekem David hem sorre tumas, and hem raetem wanfala naes singsing olsem: ‘Mi feel sorre tumas for iu, brata bilong mi Jon′a‧than. Mi lovem iu tumas!’

Bihaen long diswan David go bak long Israel long taon bilong He′bron. Wanfala war hem gohed long there midolwan long olketa wea chusim son bilong Saul, Ish-bo′sheth for king, and olketa narawan wea wantem David for kamap king. Bat gogo olketa man bilong David win. David hem 30 year taem hem kamap king. For seven and haf year hem rul long He′bron. Samfala son bilong hem nao, Am′non, Ab′sa‧lom and Ad‧o‧ni′jah.

Then wantaem David and olketa man bilong hem go for faet againstim and tekovarem wanfala taon wea luk naes tumas, Jerusalem. Jo′ab, wea hem narafala son bilong sista bilong David, Ze‧ru′iah, hem leadim disfala faet. So David givim reward long Jo′ab taem hem mekem hem kamap chief long army bilong hem. So David start nao for rul long taon bilong Jerusalem.

1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Chronicles 11:1-9.



Olketa Kwestin

  • Wanem nao David and Abishai duim taem Saul hem sleep long camp bilong hem?
  • Olketa wanem kwestin nao David askem long Saul?
  • Wea nao David hem go bihaen hem lusim Saul?
  • David hem barava feel sorre long wanem samting wea datwan nao mekem hem raetem wanfala song wea here naes tumas?
  • David hem haomas year taem hem kamap king long Hebron, and hu nao nem bilong samfala son bilong hem?
  • Bihaen, David hem rul long wea nao?

Samfala extra kwestin

  • Readim 1 Samuel 26:1-25.

    Samting wea David talem long 1 Samuel 26:11 showimaot hem ting hao long theocratic order? (Ps. 37:7; Rom. 13:2)

    Taem iumi duim best for showimaot loving-kaeness long samwan bat hem no tinghae long datwan, hao nao samting wea David talem long 1 Samuel 26:23 savve helpem iumi for keepim stretfala tingting abaotem datwan? (1 Ki. 8:32; Ps. 18:20)

  • Readim 2 Samuel 1:26.

    Hao nao olketa Christian distaem savve mekem grow “barava strongfala love for each other” olsem David and Jonathan garem for each other? (1 Pet. 4:8; Col. 3:14; 1 John 4:12)

  • Readim 2 Samuel 5:1-10.

    Haomas year nao David hem rul olsem king long Hebron and long Jerusalem? (2 Sam. 5:4, 5)

    Wanem nao mekem David hem barava win olsem King, and hao nao datwan hem wanfala reminder for iumi distaem? (2 Sam. 5:10; 1 Sam. 16:13; 1 Cor. 1:31; Phil. 4:13)