Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 53: Promis Bilong Jephthah

Story 53: Promis Bilong Jephthah
Dota bilong Jephthah

WASWE, enitaem iu mekem wanfala promis and bihaen iu faendem hem hard tumas for duim samting wea iu promis for duim? Disfala man insaed long piksa hem duim olsem, dastawe hem feel sorre tumas. Disfala man hem Jeph′thah, wanfala judge bilong Israel wea no fraet.

Jeph′thah hem stap long wanfala taem wea olketa Israelite no gohed for worshipim Jehovah. Olketa gohed for duim samting wea nogud. So Jehovah letem pipol bilong Am′mon for spoelem olketa. Diswan mekem olketa Israelite singaot go long Jehovah: ‘Mifala sin againstim iu. Plis, sevem mifala!’

Jephthah and olketa soldia bilong hem

Olketa pipol feel sorre for olketa nogud samting wea olketa duim. Olketa showimaot olketa sorre long wei wea olketa worshipim Jehovah moa. So Jehovah helpem olketa moa.

Olketa pipol chusim Jeph′thah for faet againstim olketa nogud Am′mon‧ite. Jeph′thah hem laekem tumas for Jehovah helpem hem long faet. So hem promisim Jehovah: ‘Sapos iu mekem mi winim olketa Am′mon‧ite, first wan wea kamaot from haos bilong mi for meetim mi taem mi kam bak, mi bae givim hem long iu.’

Jehovah herem promis bilong Jeph′thah, and hem helpem hem for winim datfala faet. Taem Jeph′thah kam bak long haos, iu savve hu nao first wan wea kamaot for meetim hem? Hem nao dota bilong hem, only pikinini bilong hem. Jeph′thah hem singaot olsem: ‘Oh, dota bilong mi! Iu mekem mi feel sorre tumas. Bat mi mekem promis finis long Jehovah, and mi kanduit for tekem bak.’

Taem dota bilong Jeph′thah hem savve long promis bilong hem, firstaem hem tu feel sorre. From diswan minim hem mas lusim dadi and olketa fren bilong hem. And hem bae spendem full laef bilong hem for servem Jehovah long tabernacle bilong hem long Shi′loh. So hem sei olsem long dadi bilong hem: ‘Sapos iu mekem wanfala promis long Jehovah, iu mas duim samting wea iu promis for duim.’

So, dota bilong Jeph′thah hem go long Shi′loh, and hem spendem full laef bilong hem for servem Jehovah long tabernacle bilong hem. Fofala day evri year olketa woman long Israel savve go for visitim hem long there, and olketa savve enjoyim gudfala taem tugeta. Olketa pipol lovem dota bilong Jeph′thah bikos hem barava gudfala servant bilong Jehovah.

Judges 10:6-18; 11:1-40.



Olketa Kwestin

  • Hu nao Jephthah, and hem laef long wanem taem?
  • Wanem promis nao Jephthah talem long Jehovah?
  • Why nao Jephthah feel sorre taem hem kasem bak haos bihaen hem win long faet againstim olketa Ammonite?
  • Wanem nao dota bilong Jephthah talem taem hem savve abaotem promis wea Dadi bilong hem talem long Jehovah?
  • Why nao olketa pipol lovem dota bilong Jephthah?

Samfala extra kwestin

  • Readim Judges 10:6-18.

    Wei wea olketa Israelite no faithful long Jehovah staka taem, givim wanem warning wea iumi shud ting strong long hem? (Judg. 10:6, 15, 16; Rom. 15:4; Rev. 2:10)

  • Readim Judges 11:1-11, 29-40.

    Hao nao iumi savve sure Jephthah no really bonem dota bilong hem long fire taem hem givim hem olsem wanfala “bone sakrifaes”? (Judg. 11:31; Lev. 16:24; Deut. 18:10, 12)

    Long wanem wei nao Jephthah givim dota bilong hem olsem sakrifaes?

    Wanem nao iumi savve lanem from tingting bilong Jephthah abaotem promis wea hem talem long Jehovah? (Judg. 11:35, 39; Eccl. 5:4, 5; Matt. 16:24)

    Hao nao dota bilong Jephthah hem gudfala example for olketa young Christian saed long wei for aftarem full-taem service? (Judg. 11:36; Matt. 6:33; Phil. 3:8)