Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 51: Ruth and Naomi

Story 51: Ruth and Naomi

INSAED long Bible, iu savve lukim wanfala buk wea garem nem Ruth. Hem story abaotem wanfala famili wea stap long taem wea Israel garem olketa judge. Ruth hem wanfala young woman from land bilong Mo′ab; hem no from nation bilong God, Israel. Bat taem Ruth hem lane abaotem trufala God Jehovah, hem barava lovem hem tumas. Na′o‧mi hem wanfala olo woman wea helpem Ruth for lane abaotem Jehovah.

Na′o‧mi hem wanfala Israelite woman. Hem and hasband bilong hem and tufala son bilong olketa muv go long land bilong Mo′ab long taem wea no plande kaikai stap long Israel. Then wanday hasband bilong Na′o‧mi hem dae. Bihaen, tufala son bilong Na′o‧mi maritim tufala gele from Mo′ab, Ruth and Or′pah. Bat 10-fala year bihaen, tufala son bilong Na′o‧mi dae. Na′o‧mi and tufala hia sorre tumas! Wanem nao Na′o‧mi bae duim?

Wanday, Na′o‧mi disaed for go bak long hom. Ruth and Or′pah laek for stap witim hem, so olketa wakabaot go tu. Bat taem olketa gogo lelebet long road, Na′o‧mi sei long tufala hia: ‘Go bak hom and stap witim mami bilong iutufala.’

Na′o‧mi sei gudbae and kissim tufala. Then tufala start for krae nao, from olketa barava lovem Na′o‧mi. Tufala sei: ‘Nomoa! Mifala bae go witim iu and stap witim iufala.’ Bat Na′o‧mi hem sei: ‘Iutufala mas go bak, olketa dota bilong mi. Hem moabeta for iutufala go bak hom.’ So Or′pah start for wakabaot go bak. Bat Ruth hem no go.

Na′o‧mi luk long hem and sei: ‘Or′pah hem go nao. Iu tu go bak hom witim hem.’ Bat Ruth ansa olsem: ‘No trae for mekem mi lusim iu! Letem mi go witim iu. Ples wea iu go mi bae go, and ples wea iu stap mi bae stap. Olketa wantok bilong iu bae kamap olketa wantok bilong mi, and God bilong iu bae kamap God bilong mi. Ples wea iu dae mi bae dae, and long there nao olketa bae berem mi.’ Taem Ruth talem diswan Na′o‧mi no trae moa for mekem hem go bak long hom.

Gogo tufala woman hia kasem Israel. So tufala stap long there. Ruth hem start for waka long olketa garden bikos hem taem for harvestim barley. Wanfala man, Bo′az, hem letem hem hipimap barley long olketa garden bilong hem. Waswe, iu savve hu nao mami bilong Bo′az? Hem nao Ra′hab bilong taon bilong Jer′i‧cho.

Wanday, Bo′az tok olsem long Ruth: ‘Mi herem evri samting abaotem iu, and wei wea iu kaen tumas long Na′o‧mi. Mi savve iu lusim dadi and mami bilong iu and lusim tu kantri bilong iu and kam for stap midolwan long pipol wea iu nating savve bifor. Jehovah bae showimaot gudfala fasin long iu!’

Ruth hem sei: ‘Iu kaen tumas long mi, sir. Iu mekem mi feel gud from gudfala wei wea iu tok olsem long mi.’ Bo′az hem laekem Ruth tumas, and no longtaem bihaen tufala marit. Diswan mekem Na′o‧mi hapi fogud! And Na′o‧mi hem moa hapi taem Ruth and Bo′az garem firstfala son bilong olketa, O′bed. Bihaen, O′bed kamap grandadi bilong David, wea iumi bae lanem plande samting abaotem hem bihaen.

Ruth and Naomi

Bible buk bilong Ruth.



Olketa Kwestin

  • Why nao Naomi go stap long land bilong Moab?
  • Hu nao Ruth and Orpah?
  • Wanem nao Ruth and Orpah duim taem Naomi talem tufala for go bak long hom bilong olketa?
  • Hu nao Boaz, and hao nao hem helpem Ruth and Naomi?
  • Hu nao nem bilong pikinini bilong Boaz and Ruth, and why nao iumi shud no forgetim hem?

Samfala extra kwestin

  • Readim Ruth 1:1-17.

    Ruth talem wanem naesfala toktok wea showimaot loyal love? (Ruth 1:16, 17)

    Hao nao tingting bilong Ruth hem barava semsem witim tingting bilong olketa “nara sheep” abaotem olketa anointed wan long earth distaem? (John 10:16; Zech. 8:23)

  • Readim Ruth 2:1-23.

    Hao nao Ruth showimaot gudfala example for olketa young woman distaem? (Ruth 2:17, 18; Prov. 23:22; 31:15)

  • Readim Ruth 3:5-13.

    Hao nao Boaz ting long wei wea Ruth hem willing for maritim hem winim for maritim narawan wea moa young?

    Tingting bilong Ruth teachim iumi wanem samting abaotem loyal love? (Ruth 3:10; 1 Cor. 13:4, 5)

  • Readim Ruth 4:7-17.

    Hao nao olketa Christian man distaem savve olsem Boaz? (Ruth 4:9, 10; 1 Tim. 3:1, 12, 13; 5:8)