Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 49: Sun Hem No Muv

Story 49: Sun Hem No Muv

LUKIM Joshua. Hem sei: ‘Sun, no muv!’ And sun hem no muv nao. Hem stap long there long midol long skae for wanfala full day. Jehovah nao mekem diswan happen! Bat bae iumi lukim why nao Joshua wantem sun for gohed for shaen.

Sun

Taem faevfala nogud king long land bilong Ca′naan start for faet againstim olketa bilong Gib′e‧on, olketa bilong Gib′e‧on sendem wanfala man for askem Joshua for helpem olketa. Man hia hem sei: ‘Kam long mifala kwiktaem! Sevem mifala! Evri king from olketa ples long olketa hill olketa kam for faet againstim olketa servant bilong iufala.’

Joshua and olketa soldia bilong hem kwiktaem go. Olketa march for full naet. Taem olketa kasem Gib′e‧on, olketa soldia bilong faevfala king hia fraet and start for ranawe. Then Jehovah mekem olketa bigfala hail ston for foldaon from skae, and namba bilong olketa soldia wea dae from olketa hail ston hia hem winim namba wea olketa soldia bilong Joshua killim dae.

Joshua

Joshua lukim hao klosap nao sun bae go daon. Hem bae dark, and plande soldia bilong faevfala nogud king bae ranawe. Dastawe Joshua prea long Jehovah and hem sei: ‘Sun, no muv!’ And taem sun hem gohed for shaen, olketa Israelite fit for winim disfala faet.

Plande moa nogud king stap long Ca′naan wea heitim pipol bilong God. For samting olsem sixfala year nao Joshua and army bilong hem mas faet witim 31 king long datfala land. Taem olketa duim diswan finis, Joshua divaedem land bilong Ca′naan for olketa tribe wea needim ples for stap.

Plande year go pas, and gogo Joshua dae taem hem 110 year. Taem hem and olketa fren bilong hem laef yet, olketa pipol obeyim Jehovah. Bat taem olketa gudfala man hia dae, olketa pipol start for duim olketa nogud samting and kasem trabol. Hem nao taem wea olketa really needim God for helpem olketa.

Joshua 10:6-15; 12:7-24; 14:1-5; Judges 2:8-13.



Olketa Kwestin

  • Insaed long piksa, wanem nao Joshua hem talem, and why nao olsem?
  • Hao nao Jehovah helpem Joshua and olketa soldia bilong hem?
  • Joshua win long faet againstim haomas king wea heitim Israel, and hem duim diswan insaed haomas year?
  • Why nao Joshua divaedem land bilong Canaan?
  • Joshua hem haomas year taem hem dae, and bihaen datwan, wanem nao happen long olketa pipol?

Samfala extra kwestin

  • Readim Joshua 10:6-15.

    For savve Jehovah mekem sun and moon no muv for Israel mekem iumi feel sure long wanem samting distaem? (Josh. 10:8, 10, 12, 13; Ps. 18:3; Prov. 18:10)

  • Readim Joshua 12:7-24.

    Hu nao really winim 31 king long Canaan, and why nao diswan hem important for iumi distaem? (Josh. 12:7; 24:11-13; Deut. 31:8; Luke 21:9, 25-28)

  • Readim Joshua 14:1-5.

    Hao nao olketa divaedem land midolwan olketa tribe bilong Israel, and diswan showimaot wanem saed long samting wea iumi bae kasem long Paradaes? (Josh. 14:2; Isa. 65:21; Ezek. 47:21-23; 1 Cor. 14:33)

  • Readim Judges 2:8-13.

    Olsem Joshua long Israel, hu nao stopem apostate fasin distaem? (Judg. 2:8, 10, 11; Matt. 24:45-47; 2 Thess. 2:3-6; Titus 1:7-9; Rev. 1:1; 2:1, 2)