Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 44: Rahab Haedem Olketa Spae

Story 44: Rahab Haedem Olketa Spae

OLKETA man hia insaed trabol. Olketa mas ranawe, nogud olketa dae. Olketa hia olketa Israelite spae, and woman wea helpem olketa hem Ra′hab. Ra′hab hem stap long haos long wall bilong bigfala taon bilong Jer′i‧cho. Bae iumi faendaot why nao olketa man hia insaed trabol.

Olketa Israelite redi for katkros long Jordan River for go insaed land bilong Ca′naan. Bat bifor olketa go, Joshua sendem tufala spae. Hem sei long olketa: ‘Go and lukluk long land and datfala taon Jer′i‧cho.’

Rahab and tufala Israelite spae

Taem olketa spae kam insaed long Jer′i‧cho, olketa go long haos bilong Ra′hab. Bat samwan hem talem king bilong Jer′i‧cho: ‘Tufala Israelite kam long hia tunaet for spaem land.’ Taem hem herem diswan, king hem sendem samfala man go long Ra′hab, and olketa komandim hem: ‘Tekem kam olketa man wea stap insaed long haos bilong iu!’ Bat Ra′hab hem haedem olketa long ruf long haos bilong hem. So hem sei: ‘Samfala man kam long haos bilong mi, bat mi no savve wea nao olketa kam from. Olketa go taem hem gogo for dark, bifor olketa satem gate bilong taon. Sapos iufala hariap, iufala savve kasem olketa!’ So olketa man hia ran go bihaenem olketa.

Bihaen olketa go, Ra′hab go ap long ruf. Hem sei long olketa spae: ‘Mi savve Jehovah bae givim iufala disfala land. Mifala herem hao hem mekem Red Sea kamap drae taem iufala lusim Egypt, and iufala killim dae king Si′hon and king Og. Mi showimaot kaenfala fasin long iufala, so plis, iufala promis for showimaot kaenfala fasin long mi tu. Sevem dadi and mami, and olketa brata and sista bilong mi.’

Olketa spae hia promis for duim datwan, bat Ra′hab mas duim wanfala samting. Olketa spae sei: ‘Tekem disfala red rope and taemap long window bilong iu and hipimap olketa relative bilong iu long haos bilong iu. And taem mifala evriwan kam bak for finisim Jer′i‧cho, mifala bae lukim disfala rope long window bilong iu and mifala bae no killim dae eniwan insaed long haos bilong iu.’ Taem olketa spae go bak long Joshua, olketa talem hem evri samting wea happen.

Joshua 2:1-24; Hebrews 11:31.



Olketa Kwestin

  • Wea nao Rahab hem stap?
  • Hu nao tufala man insaed long piksa, and why nao olketa kam long Jericho?
  • King bilong Jericho komandim Rahab for duim wanem samting, and wanem nao ansa bilong hem?
  • Hao nao Rahab helpem tufala man hia, and wanem nao hem askem from tufala?
  • Tufala spae promisim wanem samting long Rahab?

Samfala extra kwestin

  • Readim Joshua 2:1-24.

    Hao nao promis bilong Jehovah long Exodus 23:28 hem fulfill taem olketa Israelite againstim Jericho? (Josh. 2:9-11)

  • Readim Hebrews 11:31.

    Hao nao example bilong Rahab showimaot hao faith hem barava important?