Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 43: Joshua Hem Kamap Leader

Story 43: Joshua Hem Kamap Leader

MOSES hem want for go insaed long Ca′naan witim olketa Israelite. So hem ask olsem: ‘Letem mi for akrosim Jordan River, Jehovah, and lukim datfala gudfala land.’ Bat Jehovah hem sei: ‘Iu no askem datwan! No tok abaotem diswan moa!’ Waswe, iu savve why nao Jehovah talem diswan?

Hem from samting wea happen taem Moses hem hitim datfala ston. Remember hao hem and Aaron no honorim Jehovah. Olketa no talem olketa pipol hao Jehovah nao givim wata from datfala ston. From diswan nao Jehovah sei hem bae no letem olketa for go insaed long Ca′naan.

So tu-thri month bihaen Aaron hem dae, Jehovah talem Moses: ‘Tekem Joshua, and mekem hem standap front long priest E‧le‧a′zar and olketa pipol. And front long evriwan, talemaot hao Joshua nao hem niufala leader.’ So Moses hem duim evri samting wea Jehovah talem, olsem iu savve lukim insaed long piksa.

Moses talemaot Joshua nao leader

Then Jehovah talem Joshua: ‘Iu mas strong, and no fraet. Iu bae leadim olketa Israelite go insaed long land bilong Ca′naan wea mi promisim long olketa, and mi bae stap witim iu.’

Bihaen, Jehovah talem Moses for klae go antap long Maunt Ne′bo long land bilong Mo′ab. Long there, Moses savve luk go narasaed long Jordan River and lukim barava naesfala land bilong Ca′naan. Jehovah hem sei: ‘Diswan nao land wea mi promis for givim long olketa pikinini bilong Abraham, Isaac and Jacob. Mi letem iu for lukim, bat mi bae no letem iu for go insaed.’

Long there, antap long Maunt Ne′bo, Moses hem dae. Hem 120 year. Hem still strong and eye bilong hem still savve lukluk gud. Olketa pipol feel sorre and krae bikos Moses hem dae. Bat olketa hapi for garem Joshua olsem niufala leader bilong olketa.

Numbers 27:12-23; Deuteronomy 3:23-29; 31:1-8, 14-23; 32:45-52; 34:1-12.



Olketa Kwestin

  • Hu nao tufala man long piksa wea standap witim Moses?
  • Wanem nao Jehovah talem long Joshua?
  • Why nao Moses klae go antap long Maunt Nebo, and wanem nao Jehovah sei long hem?
  • Moses hem haomas year taem hem dae?
  • Why nao olketa pipol sorre, bat olketa garem wanem reason for hapi?

Samfala extra kwestin

  • Readim Numbers 27:12-23.

    Wanem nao bigfala assignment wea Joshua kasem from Jehovah, and hao nao wei wea Jehovah hem kea for pipol bilong Hem showaot distaem? (Num. 27:15-19; Acts 20:28; Heb. 13:7)

  • Readim Deuteronomy 3:23-29.

    Why nao Jehovah no letem Moses and Aaron go insaed long Promis Land, and wanem nao iumi savve lanem from diswan? (Deut. 3:25-27; Num. 20:12, 13)

  • Readim Deuteronomy 31:1-8, 14-23.

    Hao nao last samting wea Moses talem for Israel showimaot Moses hem hambol for acceptim datfala discipline from Jehovah? (Deut. 31:6-8, 23)

  • Readim Deuteronomy 32:45-52.

    Hao nao Word bilong God shud affectim laef bilong iumi? (Deut. 32:47; Lev. 18:5; Heb. 4:12)

  • Readim Deuteronomy 34:1-12.

    Nomata no enitaem Moses barava lukim Jehovah, wanem nao Deuteronomy 34:10 showimaot abaotem wei wea hem fren witim Jehovah? (Ex. 33:11, 20; Num. 12:8)