Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 42: Donkey wea Toktok

Story 42: Donkey wea Toktok

WASWE, iu herem enitaem wanfala donkey hem toktok? Maet iu sei: ‘Nomoa. Olketa animal no savve toktok.’ Bat Bible hem story abaotem wanfala donkey wea toktok. Bae iumi lukim hao nao diswan happen.

Wanfala angel

Olketa Israelite klosap nao for go insaed long land bilong Ca′naan. Ba′lak, king bilong Mo′ab, hem fraetem olketa Israelite. So hem askem wanfala kleva man, Ba′laam, for cursim olketa Israelite. Ba′lak promis for givim staka selen long Ba′laam, so Ba′laam raedem donkey bilong hem go long Ba′lak for lukim hem.

Jehovah no wantem Ba′laam for cursim pipol bilong Hem. So hem sendem wanfala angel witim longfala sword for standap long road and stopem Ba′laam. Ba′laam no savve lukim angel hia, bat donkey bilong hem nao lukim. So donkey trae for tanawe from datfala angel, and gogo, hem just leidaon nomoa long road. Ba′laam hem kros fogud, and hem whipim donkey bilong hem witim wanfala stik.

Then Jehovah mekem Ba′laam herem donkey bilong hem toktok long hem. Donkey hia hem ask olsem: ‘Wanem nao mi duim long iu mekem iu whipim mi?’

Balaam sidaon long wanfala donkey

Ba′laam hem sei: ‘Iu mekem mi luk olsem wanfala krangge man. Sapos mi garem wanfala sword mi bae killim iu dae!’

Donkey hem ask: ‘Waswe, mi duim diswan long iu bifor?’

Ba′laam hem sei: ‘Nomoa.’

Then Jehovah letem Ba′laam for lukim angel wea standap witim longfala sword long road. Angel hia hem sei: ‘Why nao iu whipim donkey bilong iu? Mi kam for blokem gogo bilong iu, bikos iu go for cursim Israel. Sapos donkey bilong iu hem no tanawe from mi, mi killim iu dae finis, bat no donkey bilong iu.’

Ba′laam sei: ‘Mi sin nao. Mi no savve iu standap long road.’ Angel hem letem Ba′laam for go, and Ba′laam hem go for lukim Ba′lak. Hem still trae for cursim Israel, bat, Jehovah mekem hem blessim Israel thrifala taem.

Numbers 21:21-35; 22:1-40; 23:1-30; 24:1-25.



Olketa Kwestin

  • Hu nao Balak, and why nao hem askem Balaam for kam long hem?
  • Why nao donkey bilong Balaam leidaon long road?
  • Balaam herem datfala donkey talem wanem samting?
  • Wanem nao wanfala angel hem talem long Balaam?
  • Wanem nao happen taem Balaam trae for cursim Israel?

Samfala extra kwestin

  • Readim Numbers 21:21-35.

    Why nao Israel win long faet againstim King Sihon bilong olketa Amorite and King Og bilong Bashan? (Num. 21:21, 23, 33, 34)

  • Readim Numbers 22:1-40.

    Wanem nao muvim Balaam for trae cursim Israel, and wanem nao iumi savve lanem from diswan? (Num. 22:16, 17; Prov. 6:16, 18; 2 Pet. 2:15; Jude 11)

  • Readim Numbers 23:1-30.

    Nomata Balaam story olsem hem man wea worshipim Jehovah, hao nao samting wea hem duim showimaot hem no worshipim Jehovah? (Num. 23:3, 11-14; 1 Sam. 15:22)

  • Readim Numbers 24:1-25.

    Hao nao disfala story long Bible strongim faith bilong iumi hao no eni samting savve stopem plan bilong Jehovah? (Num. 24:10; Isa. 54:17)