Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 41: Copper Snek

Story 41: Copper Snek
Moses and datfala copper snek

WASWE, datfala snek raonem datfala stik hem wanfala really snek? Nomoa. Olketa mekem snek hia from copper. Jehovah talem Moses for putim hem long wanfala stik mekem olketa pipol savve luk long hem for stap laef. Bat olketa narafala snek long graon olketa really wan. Olketa baetem olketa pipol and mekem olketa sik. Waswe, iu savve why nao olsem?

Hem from olketa Israelite tok againstim God and Moses. Olketa komplen olsem: ‘Why nao iufala bringim mifala aot from Egypt for dae long disfala wilderness? No eni kaikai or wata stap long hia. And mifala les nao for kaikaim manna.’

Bat manna hem gudfala kaikai. Thru long wanfala mirakol nao Jehovah hem givim diswan long olketa. And thru long wanfala mirakol hem givim olketa wata tu. Bat olketa pipol no tinghae long wei wea God lukaftarem olketa. So Jehovah sendem olketa poison snek hia for panisim olketa Israelite. Olketa snek baetem olketa, and plande long olketa dae.

Olketa Israelite wea olketa snek baetem

Gogo, olketa pipol kam long Moses and sei: ‘Mifala sin nao, bikos mifala tok againstim Jehovah and iu. Prea long Jehovah for tekem awe olketa snek hia.’

So Moses prea for olketa pipol hia. And Jehovah talem Moses for wakem disfala copper snek. Hem sei for putim hem long wanfala stik, mekem eniwan wea snek baetem olketa mas luk long hem. Moses duim samting wea God talem. And olketa pipol wea snek baetem olketa luk long datfala copper snek and olketa kamap gud moa.

Iumi savve lanem samting from diswan. Iumi evriwan olsem olketa Israelite wea snek baetem olketa. Iumi evriwan gogo for dae. Luk raonem iu, and iu bae lukim pipol wea kamap olo, kasem sik, and dae. Diswan hem from firstfala man and woman, Adam and Eve, olketa tanawe from Jehovah, and iumi olketa pikinini bilong olketa. Bat Jehovah hem mekem wanfala wei for iumi savve laef olowe.

Jehovah sendem kam long earth, Son bilong hem, Jesus Christ. Olketa hangem Jesus long wanfala post, bikos plande pipol tingse hem nogud man. Bat Jehovah givim Jesus for sevem iumi. Sapos iumi luk long hem, wea minim for followim hem, then iumi savve kasem laef olowe. Bat iumi bae lanem moa samting abaotem diswan bihaen.

Numbers 21:4-9; John 3:14, 15.



Olketa Kwestin

  • Wanem nao stap raonem datfala stik insaed long piksa, and why nao Jehovah talem Moses for putim datwan long there?
  • Wanem nao showimaot olketa pipol nating tinghae long evri samting wea God duim for olketa?
  • Bihaen Jehovah sendem olketa poison snek for panisim olketa, wanem nao olketa askem Moses for duim?
  • Why nao Jehovah talem Moses for wakem wanfala copper snek?
  • Wanem nao iumi savve lanem from disfala story?

Samfala extra kwestin

  • Readim Numbers 21:4-9.

    Wanemwarning nao iumi kasemfromwei wea olketa Israelite komplen abaotem samting wea Jehovah provaedem? (Num. 21:5, 6; Rom. 2:4)

    For plande handred year bihaen, olketa Israelite gohed for duim wanem long datfala copper snek, and wanem nao King Hezekiah duim saed long diswan? (Num. 21:9; 2 Ki. 18:1-4)

  • Readim John 3:14, 15.

    Hao nao wei for putim datfala copper snek long wanfala stik hem barava piksarem wei wea Jesus Christ hem dae? (Gal. 3:13; 1 Pet. 2:24)