Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 40: Moses Hitim Ston

Story 40: Moses Hitim Ston

PLANDE year go pas—10 year, 20 year, 30 year, 39 year! And olketa Israelite still stap long wilderness. Bat long evri year hia, Jehovah hem lukaftarem pipol bilong hem. Hem feedim olketa witim manna. Hem leadim olketa long daytaem witim wanfala cloud, and long naetaem witim fire. And insaed long evri year hia kaleko bilong olketa no brek and leg bilong olketa no garem soa.

Distaem hem firstfala month bilong mek-40 year from taem wea olketa lusim Egypt. Olketa Israelite camp moa long Ka′desh. Diswan nao ples wea olketa stap taem olketa sendem 12-fala spae go long land bilong Ca′naan 40-fala year bifor. Sista bilong Moses, Mir′i‧am, hem dae long Ka′desh. And olsem bifor, trabol hem kamap.

Olketa pipol no savve faendem eni wata. So olketa komplen long Moses: ‘Hem moabeta sapos mifala dae finis. Why nao iu bringim mifala aot from Egypt long disfala rabis ples wea no eni samting savve grow? No eni wheat, fig, grape, or pomegranate. No eni wata tu for drink.’

Moses hitim ston witim stik

Taem Moses and Aaron go long tabernacle for prea, Jehovah talem Moses: ‘Hipimap olketa pipol tugeta. Then front long evriwan, tok long datfala ston long there. Inaf wata bae kamaot for olketa pipol and evri animal bilong olketa.’

So Moses hipimap olketa pipol, and sei: ‘Lisin, iufala wea nating trustim God! Waswe, mitufala Aaron mas aotem wata from disfala ston for iufala?’ Then Moses hitim ston hia witim wanfala stik tufala taem and bigfala wata kamaot from datfala ston. Inaf wata hem kamaot for evri pipol and animal for drinkim.

Bat Jehovah hem kros witim Moses and Aaron. Waswe, iu savve why? Hem from Moses and Aaron sei olketa nao bae mekem wata kamaot from datfala ston. Bat really, Jehovah nao duim datwan. And from Moses and Aaron no talem tru samting abaotem diswan, Jehovah sei hem bae panisim olketa. Hem sei: ‘Iu bae no leadim pipol bilong mi go insaed long Ca′naan.’

No longtaem bihaen, olketa Israelite lusim Ka′desh. Then olketa kasem Maunt Hor. Long there, antap long datfala maunten, Aaron hem dae. Hem 123 year taem hem dae. Olketa Israelite feel sorre tumas, so for 30 day evri pipol olketa krae for Aaron. Son bilong hem E‧le‧a′zar nao kamap nextfala hae priest for nation bilong Israel.

Numbers 20:1-13, 22-29; Deuteronomy 29:5.



Olketa Kwestin

  • Hao nao Jehovah lukaftarem olketa Israelite taem olketa stap long wilderness?
  • Taem olketa camp long Kadesh, olketa Israelite komplen abaotem wanem?
  • Hao nao Jehovah provaedem wata for olketa and animal bilong olketa?
  • Hu nao man insaed long piksa wea point long hemseleva, and why nao hem duim datwan?
  • Why nao Jehovah hem kros long Moses and Aaron, and hao nao hem panisim olketa?
  • Wanem nao happen long Maunt Hor, and hu nao kamap hae priest bilong Israel?

Samfala extra kwestin

  • Readim Numbers 20:1-13, 22-29 and Deuteronomy 29:5.

    Wanem nao iumi lanem from wei wea Jehovah lukaftarem olketa Israelite long wilderness? (Deut. 29:5; Matt. 6:31; Heb. 13:5; Jas. 1:17)

    Hao nao Jehovah ting long wei wea Moses and Aaron fail for honorim hem front long Israel? (Num. 20:12; 1 Cor. 10:12; Rev. 4:11)

    Wanem nao iumi savve lanem from wei wea Moses acceptim discipline wea hem kasem from Jehovah? (Num. 12:3; 20:12, 27, 28; Deut. 32:4; Heb. 12:7-11)