Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 38: Twelvfala Spae

Story 38: Twelvfala Spae
Tufala Israelite spae karem frut

LUKIM olketa frut wea tufala man hia karem. Olketa grape hia big fogud. Tufala man nao mas karem wanfala bunch long wanfala stik. And lukim olketa fig and pomegranate. Wea nao olketa naesfala frut hia kam from? From land bilong Ca′naan. Remember, Ca′naan nao hem ples wea Abraham, Isaac and Jacob stap bifor. Bat from bigfala hangre wea kamap long there, Jacob and famili bilong hem muv go long Egypt. Distaem, 216 year bihaen, Moses hem leadim olketa Israelite go bak long Ca′naan. Olketa kam long Ka′desh, wanfala ples long wilderness.

Olketa nogud pipol nao stap long land bilong Ca′naan. So, Moses sendem go 12-fala spae, and talem olketa: ‘Faendemaot haomas pipol nao stap long there, and sapos olketa strong or nomoa. Faendemaot sapos graon hem gud for growim kaikai. And mek sure iufala bringim kam bak samfala frut.’

Taem olketa spae kam bak long Ka′desh, olketa talem Moses: ‘Hem wanfala naesfala kantri.’ And for pruvim diswan, olketa showim olketa frut hia. Bat 10-fala spae sei: ‘Olketa pipol wea stap long there olketa big and strong. Olketa bae killim iumi dae sapos iumi trae for tekem datfala land.’

Olketa Israelite fraet taem olketa herem diswan. Olketa sei: ‘Hem moabeta sapos iumi dae kam long Egypt or hia long wilderness. Iumi bae dae long faet, and olketa bae kasholem olketa waef and pikinini bilong iumi. Iumi chusim wanfala niu leader for changem Moses, and go bak long Egypt!’

Bat tufala spae trustim Jehovah, and trae for mekem olketa pipol no wari. Olketa nao Joshua and Ca′leb. Olketa sei: ‘No fraet, Jehovah hem stap witim iumi. Hem bae isi nomoa for tekem datfala land.’ Bat olketa pipol no lisin. Olketa want for killim dae Joshua and Ca′leb tu.

Diswan mekem Jehovah kros fogud, and hem talem Moses: ‘No eniwan wea age bilong hem 20 year or winim datwan, bae go insaed long land bilong Ca′naan. Olketa lukim finis olketa mirakol wea mi duim long Egypt and long wilderness, bat olketa still no trustim mi. So olketa bae wakabaot insaed long wilderness for 40 year go kasem taem wea evriwan long olketa dae. Joshua and Caleb nomoa bae go insaed long land bilong Ca′naan.’

Numbers 13:1-33; 14:1-38.



Olketa Kwestin

  • Hao nao lukluk bilong olketa grape long piksa, and wea nao olketa kam from?
  • Why nao Moses sendem 12-fala spae go long land bilong Canaan?
  • Wanem nao tenfala spae talem long Moses taem olketa kam bak?
  • Hao nao tufala spae showimaot olketa trust long Jehovah, and hu nao nem bilong tufala?
  • Why nao Jehovah hem kros, and wanem nao hem talem long Moses?

Samfala extra kwestin

  • Readim Numbers 13:1-33.

    Hu nao Moses chusim for spaem datfala land, and diswan givim olketa nambawan chance for duim wanem? (Num. 13:2, 3, 18-20)

    Why nao tingting bilong Joshua and Caleb hem difren from olketa nara spae, and wanem nao iumi lanem from diswan? (Num. 13:28-30; Matt. 17:20; 2 Cor. 5:7)

  • Readim Numbers 14:1-38.

    Iumi mas ting strong long wanem warning saed long wei for komplen abaotem olketa wea stand for Jehovah long earth? (Num. 14:2, 3, 27; Matt. 25:40, 45; 1 Cor. 10:10)

    Hao nao Numbers 14:24 showimaot Jehovah hem interest long olketa servant bilong hem wanwan? (1 Ki. 19:18; Prov. 15:3)