Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 36: Gold Buluka

Story 36: Gold Buluka

SEI! Wanem nao pipol hia duim? Olketa prea long wanfala buluka! Why nao olketa duim diswan?

Taem Moses hem stap antap long maunten for longfala taem, olketa pipol sei: ‘Iumi no savve wanem nao happen long Moses. So iumi mekem wanfala god for leadim iumi from disfala land.’

Moses torowem go daon tufala flat ston

Brata bilong Moses, Aaron, hem sei: ‘Olraet, tekaotem olketa gold earring bilong iufala, and tekem kam long mi.’ Taem olketa pipol duim diswan, Aaron hem meltim gold hia and mekem wanfala gold buluka. And olketa pipol sei: ‘Diswan hem God bilong iumi, wea leadim iumi aot from Egypt!’ Then olketa Israelite mekem wanfala bigfala party, and worshipim datfala buluka.

Taem Jehovah lukim diswan, hem kros fogud. So hem sei long Moses: ‘Hariap go daon. Olketa pipol duim barava nogud samting. Olketa forgetim finis olketa law bilong mi and olketa baodaon long wanfala gold buluka.’

Pipol wea worshipim wanfala gold buluka

Moses hariap go daon from maunten. And taem hem kam klosap, wanem nao hem lukim? Olketa pipol singsing and dance raonem datfala gold buluka! Moses hem kros fogud so hem torowem go daon tufala flat ston bilong olketa law, and olketa pisis nao. Hem tekem datfala gold buluka and meltim and smasem hem mekem hem kamap olsem powder.

Olketa pipol duim barava nogud samting. So Moses talem samfala man for tekem sword bilong olketa. Moses hem sei: ‘Olketa nogud pipol wea worshipim gold buluka mas dae.’ So olketa man hia killim dae 3,000 pipol! Diswan showimaot hao iumi mas mek sure iumi worshipim Jehovah nomoa, no olketa false god, iaman?

Exodus 32:1-35.



Olketa Kwestin

  • Wanem nao pipol duim insaed piksa, and why nao olsem?
  • Why nao Jehovah hem kros, and wanem nao Moses duim taem hem lukim samting wea olketa pipol duim?
  • Wanem nao Moses talem samfala man for duim?
  • Wanem nao iumi shud lanem from disfala story?

Samfala extra kwestin

  • Readim Exodus 32:1-35.

    Hao nao disfala story showimaot tingting bilong Jehovah abaotem wei for mixim giaman religion witim trufala worship? (Ex. 32:4-6, 10; 1 Cor. 10:7, 11)

    Olketa Christian mas careful long wanem samting saed long hapitaem wea olketa chusim, olsem wei for singsing and dance? (Ex. 32:18, 19; Eph. 5:15, 16; 1 John 2:15-17)

    Hao nao tribe bilong Levi showimaot gudfala example long wei for saedem raeteous fasin? (Ex. 32:25-28; Ps. 18:25)