Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 35: Jehovah Givim Olketa Law Bilong Hem

Story 35: Jehovah Givim Olketa Law Bilong Hem

TUFALA month bihaen olketa lusim Egypt, olketa Israelite kam long Maunt Si′nai, wea garem nem Ho′reb tu. Diswan hem sem ples wea Jehovah tok long Moses from tree wea bone. Olketa pipol camp long hia and stap for lelebet taem.

Olketa pipol weit long daon taem Moses klae go ap long datfala maunten. Long there, antap long maunten, Jehovah talem Moses hao Hem wantem olketa Israelite for obeyim Hem and for kamap spesol pipol bilong Hem. Taem Moses kam daon, hem talem olketa Israelite samting wea Jehovah talem. And olketa pipol sei olketa bae obeyim Jehovah, bikos olketa want for kamap pipol bilong hem.

Then Jehovah duim wanfala spesol samting. Hem mekem antap long datfala maunten for smoke, and hem mekem bigfala thunder. Hem tok tu long olketa pipol: ‘Mi nao Jehovah, God bilong iufala wea bringim iufala aot from Egypt.’ Then hem komandim olketa olsem: ‘Iufala mas no worshipim eni nara god, mi nomoa iufala mas worshipim.’

Tufala flat ston

Then God givim olketa Israelite naenfala komandment moa, wea olketa hia olketa law. Pipol hia fraet fogud. Olketa talem Moses: ‘Iu nao tok long mifala, bikos sapos God tok long mifala, mifala fraet nogud mifala dae.’

Bihaen Jehovah talem Moses: ‘Kam long mi long maunten. Mi bae givim iu tufala flat ston wea mi raetem finis olketa law wea mi wantem olketa pipol for followim.’ So Moses go ap moa long maunten. For 40 day and naet hem stap long there.

God garem plande law for pipol bilong hem. Moses raetem olketa law hia. God givim long Moses tufala flat ston hia. God seleva nao hem raetem 10-fala law wea hem talem long olketa pipol. Olketa nao Ten Komandment.

Moses long Maunt Sinai

Ten Komandment olketa important law. And tu, plande narafala law wea God givim long olketa Israelite olketa important. Wanfala law hia nao: ‘Iu mas lovem God bilong iu Jehovah witim full heart bilong iu, full mind bilong iu, full soul bilong iu and full strong bilong iu.’ And narawan hem olsem: ‘Iu mas lovem neiba bilong iu olsem iuseleva.’ Son bilong God, Jesus Christ, hem sei tufala hia important winim eni nara law wea Jehovah givim long pipol bilong hem Israel. Iumi bae lanem plande samting abaotem Son bilong God and olketa teaching bilong hem bihaen.

Exodus 19:1-25; 20:1-21; 24:12-18; 31:18; Deuteronomy 6:4-6; Leviticus 19:18; Matthew 22:36-40.



Olketa Kwestin

  • Samting olsem tufala month bihaen olketa Israelite lusim Egypt, olketa camp long wea?
  • Jehovah sei hem laekem olketa for duim wanem, and wanem nao ansa bilong olketa?
  • Why nao Jehovah givim tufala flat ston long Moses?
  • Witim Ten Komandment, wanem nao olketa nara law wea Jehovah givim olketa Israelite?
  • Wanem tufala law nao Jesus Christ sei hem nambawan?

Samfala extra kwestin

  • Readim Exodus 19:1-25; 20:1-21; 24:12-18; and 31:18.

    Hao nao toktok long Exodus 19:8 helpem iumi minim wanem nao join witim Christian dedication? (Matt. 16:24; 1 Pet. 4:1-3)

  • Readim Deuteronomy 6:4-6; Leviticus 19:18; and Matthew 22:36-40.

    Hao nao olketa Christian showimaot olketa lovem God and neiba? (Mark 6:34; Acts 4:20; Rom. 15:2)