Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 27: Nogud King Rulim Egypt

Story 27: Nogud King Rulim Egypt

OLKETA man long hia forcem pipol for waka. Lukim man wea whipim wanfala man wea waka! Olketa wea waka hia olketa from famili bilong Jacob, olketa Israelite. And olketa man wea forcem olketa for waka olketa pipol bilong Egypt. Olketa Israelite kamap slave for olketa bilong Egypt. Hao nao diswan happen?

Olketa bilong Egypt spoelem olketa Israelite

For plande year bigfala famili bilong Jacob stap long peace long Egypt. Joseph, wea hem barava important man long Egypt, wea only king Phar′aoh nomoa garem moa paoa winim hem, hem lukaftarem olketa. Bat then Joseph hem dae. And wanfala niu Phar′aoh, wea no laekem olketa Israelite, hem kamap king long Egypt.

So disfala nogud Phar′aoh hem mekem olketa Israelite kamap slave. And hem putim olketa man wea raf tumas for lukaftarem olketa. Olketa forcem olketa Israelite for waka hard for buildim olketa bigfala taon for Phar′aoh. Bat olketa Israelite still gohed for kamap plande. Gogo olketa bilong Egypt fraet nogud olketa Israelite kamap plande tumas and moa strong.

Olketa bilong Egypt spoelem olketa Israelite

So iu savve wanem nao Phar′aoh hem duim? Hem sei olsem long olketa woman wea helpem olketa Israelite mami taem olketa bornem pikinini: ‘Iufala mas killim dae evri baby boy wea born.’ Bat olketa hia olketa gudfala woman, and olketa no want for killim dae olketa baby.

So Phar′aoh givim disfala komand long pipol bilong hem: ‘Tekem olketa Israelite baby boy and killim olketa dae. Letem olketa baby gele nomoa for stap laef.’ Datwan hem barava nogud samting for komandim. Bae iumi lukim hao olketa sevem wanfala baby boy.

Exodus 1:6-22.



Olketa Kwestin

  • Hu nao man wea holem whip long piksa, and hu nao hem whipim?
  • Bihaen Joseph hem dae, wanem nao happen long olketa Israelite?
  • Why nao olketa bilong Egypt fraetem olketa Israelite?
  • Wanem komand nao Pharaoh talem long olketa woman wea helpem olketa Israelite woman for bornem pikinini?

Samfala extra kwestin

  • Readim Exodus 1:6-22.

    Hao nao Jehovah start for fulfillim promis bilong hem long Abraham? (Ex. 1:7; Gen. 12:2; Acts 7:17)

    Hao nao olketa Hebrew woman wea helpem olketa woman for bornem pikinini olketa respectim wei wea laef hem holy? (Ex. 1:17; Gen. 9:6)

    Hao nao olketa woman hia kasem reward from olketa faithful long Jehovah? (Ex. 1:20, 21; Prov. 19:17)

    Hao nao Satan trae for stopem plan bilong Jehovah saed long promis Seed bilong Abraham? (Ex. 1:22; Matt. 2:16)