Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 25: Famili Muv Go Long Egypt

Story 25: Famili Muv Go Long Egypt

JOSEPH no savve bossim olketa feeling bilong hem moa. So hem talem olketa servant bilong hem for leavim rum. Taem hem stap seleva witim olketa brata bilong hem, Joseph start for krae. Olketa brata bilong hem sapraes fogud, from olketa no savve why nao hem krae. Gogo hem sei: ‘Mi nao Joseph. Waswe, dadi bilong mi still laef yet?’

Olketa brata bilong hem barava sapraes fogud so olketa no savve toktok nao. Olketa fraet tu. Bat Joseph sei long olketa: ‘Plis kam klosap long mi.’ Taem olketa go klosap long hem, hem sei: ‘Mi nao brata bilong iufala Joseph, wea iufala salem long Egypt.’

Joseph hem gohed for story witim olketa long kaenfala wei: ‘No blamem iufala seleva for wei wea iufala salem mi kam long hia. Really, God nao wan wea sendem mi long Egypt for sevem laef bilong pipol. Phar′aoh hem mekem mi ruler bilong full kantri. So go bak kwiktaem long dadi bilong mi and talem hem diswan. And talem hem for kam and stap long hia.’

Then Joseph holem olketa brata bilong hem and kissim evriwan long olketa. Taem Phar′aoh herem olketa brata bilong Joseph kam, hem talem Joseph: ‘Letem olketa tekem olketa wagon and go long dadi bilong olketa and famili bilong olketa and kam ak long hia. Mi bae givim olketa best land long Egypt.’

Hem nao samting wea olketa duim. Long hia iu savve lukim Joseph hem meetim dadi bilong hem taem hem kam long Egypt witim full famili bilong hem.

Famili bilong Jacob hem grow big fogud. Sapos iumi kaontem Jacob and olketa pikinini and granpikinini bilong hem, evriwan long olketa 70-fala taem olketa muv go long Egypt. Bat olketa waef and plande servant kam tu. Evriwan go stap long Egypt. Olketa hia olketa Israelite, bikos God hem changem nem bilong Jacob go long Israel. Olketa Israelite kamap barava spesol pipol bilong God, olsem iumi bae lukim bihaen.

Genesis 45:1-28; 46:1-27.

Joseph and famili bilong hem


Olketa Kwestin

  • Wanem nao happen taem Joseph talem olketa brata bilong hem hao hem nao Joseph?
  • Long kaenfala wei, wanem nao Joseph explainim long olketa brata bilong hem?
  • Wanem nao Pharaoh talem taem hem herem story abaotem olketa brata bilong Joseph?
  • Haomas nao insaed famili bilong Jacob taem olketa muv go long Egypt?
  • Gogo, wanem nao nem bilong famili bilong Jacob, and why nao olketa garem datfala nem?

Samfala extra kwestin

  • Readim Genesis 45:1-28.

    Hao nao story long Bible abaotem Joseph showimaot Jehovah savve changem samting wea narawan duim for spoelem olketa servant bilong hem, for kamap samting wea helpem olketa servant bilong hem? (Gen. 45:5-8; Isa. 8:10; Phil. 1:12-14)

  • Readim Genesis 46:1-27.

    Wanem promis nao Jehovah talem long Jacob taem hem gogo for Egypt? (Gen. 46:1-4, ftn.)