Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 23: Olketa Dream Bilong Pharaoh

Story 23: Olketa Dream Bilong Pharaoh

TUFALA year go pas, and Joseph hem still stap long prison. Man wea lukaftarem wine bilong king hem nating rememberim hem. Then wanfala naet, Phar′aoh garem tufala barava spesol dream, and hem trae for tingim wanem nao olketa minim. Waswe, iu lukim hem sleep long hia? Long nextfala morning Phar′aoh kolem olketa wisefala man bilong hem and talem olketa samting wea hem dream abaotem. Bat olketa no fit for talem mining bilong olketa dream bilong hem.

Then, man wea lukaftarem wine bilong king hem just rememberim Joseph. Hem sei long Phar′aoh: ‘Taem mi stap long prison wanfala man hem stap wea savve hao for talemaot mining bilong olketa dream.’ So Phar′aoh askem olketa for tekem kam Joseph from prison.

Then Phar′aoh talem olketa dream bilong hem long Joseph: ‘Mi lukim sevenfala fat buluka wea luk naes tumas. Then mi lukim sevenfala thin buluka wea bon nating. And olketa thin buluka kaikaim olketa fat wan.

Pharaoh garem tufala dream

‘Long mek-tu dream bilong mi, mi lukim sevenfala hed bilong grain bilong wheat wea barava raep and full. Then mi lukim sevenfala thin and draefala hed bilong grain. And olketa thin grain start for kaikaim sevenfala gudfala grain.’

Joseph sei long Phar′aoh: ‘Tufala dream hia minim sem samting. Sevenfala fat buluka and sevenfala grain wea full minim sevenfala year, and sevenfala thin buluka and sevenfala thin hed bilong grain minim nara sevenfala year. Sevenfala year bae kamap wea plande kaikai bae grow long Egypt. Then sevenfala year bae kamap wea no plande kaikai bae grow.’

So Joseph sei olsem long Phar′aoh: ‘Chusim wanfala wisefala man for lukaftarem wei for hipimap kaikai insaed long sevenfala gudfala year. Then pipol bae no hangre insaed long sevenfala nogud year bihaen taem no plande kaikai grow.’

Phar′aoh laekem disfala idea. And hem chusim Joseph nao for hipimap kaikai and putim insaed long olketa stoahaos. So Joseph hem kamap wanfala barava important man long Egypt, Phar′aoh nomoa winim hem.

Eitfala year bihaen, long taem bilong bigfala hangre, Joseph lukim samfala man olketa kam. Waswe, iu savve hu nao olketa? Olketa 10-fala brata bilong hem! Dadi bilong olketa Jacob hem sendem olketa long Egypt bikos olketa start for no garem kaikai long hom bilong olketa long Ca′naan. Joseph luksavve long olketa brata bilong hem, bat olketa no luksavve long hem. Waswe, iu savve why nao olsem? Hem from Joseph hem growap big nao, and hem werem difren kaen kaleko.

Joseph hem remember hao taem hem wanfala boy, hem dream abaotem wei wea olketa brata bilong hem olketa kam long hem and baodaon long hem. Waswe, iu remember iu readim datwan? So Joseph hem luksavve God nao sendem hem long Egypt, and diswan hem for gudfala samting. Wanem nao iu tingse Joseph bae duim? Bae iumi lukim.

Genesis 41:1-57; 42:1-8; 50:20.



Olketa Kwestin

  • Wanem nao happen long Pharaoh long wanfala naet?
  • Wanem nao mekem datfala man wea lukaftarem wine bilong Pharaoh gogo rememberim Joseph?
  • Olsem piksa showimaot, wanem nao tufala dream bilong Pharaoh?
  • Joseph hem sei olketa dream hia minim wanem?
  • Hao nao Joseph hem kamap mek-tu important man long Egypt?
  • Why nao olketa brata bilong Joseph kam long Egypt, and why nao olketa no luksavve long hem?
  • Wanem dream nao Joseph rememberim, and datwan helpem hem for minim wanem samting?

Samfala extra kwestin

  • Readim Genesis 41:1-57.

    Hao nao Joseph hem mekhae long Jehovah, and hao nao olketa Christian distaem savve followim example bilong hem? (Gen. 41:16, 25, 28; Matt. 5:16; 1 Pet. 2:12)

    Hao nao olketa year wea staka kaikai grow and olketa year bilong hangre long Egypt, barava showimaot pipol bilong Jehovah distaem difren from olketa false Christian religion? (Gen. 41:29, 30; Amos 8:11, 12)

  • Readim Genesis 42:1-8 and 50:20.

    Waswe, hem rong for olketa wea worshipim Jehovah for baodaon front long wanfala man for showimaot honor and respect for position bilong hem sapos datwan hem kastom bilong kantri? (Gen. 42:6)