Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 21: Olketa Brata Heitim Joseph

Story 21: Olketa Brata Heitim Joseph

LUKIM hao boy hia hem sorre tumas. Hem Joseph. Olketa brata bilong hem just salem hem long olketa man wea gogo for Egypt. Joseph bae kamap wanfala slave. Why nao olketa haf brata bilong hem duim disfala nogud samting? Hem from olketa jealous long Joseph.

Olketa brata bilong Joseph salem hem

Dadi bilong olketa, Jacob, hem barava laekem Joseph. Hem showimaot diswan taem hem mekem wanfala naesfala coat for hem. Taem 10-fala big brata bilong hem lukim hao Jacob hem barava lovem Joseph, olketa start for jealous and for heitim Joseph. Bat narafala reason tu stap for olketa heitim hem.

Joseph garem tufala dream. Long tufala dream bilong Joseph olketa brata bilong hem baodaon long hem. Taem Joseph talem olketa brata bilong hem abaotem olketa dream hia, olketa barava heitim hem go moa.

Wanday, taem olketa big brata bilong Joseph lukaftarem olketa sheep bilong dadi bilong olketa, Jacob askem Joseph for go and lukim hao nao olketa stap. Taem olketa brata bilong Joseph lukim hem kam, samfala sei: ‘Bae iumi killim hem dae!’ Bat Reu′ben, firstborn brata hem sei: ‘Nomoa, no duim datwan!’ So olketa kasholem Joseph and torowem hem insaed long wanfala emti hol for wata. Then olketa sidaon for tingim wanem samting nao for duim witim hem.

Long semtaem samfala Ish′ma‧el‧ite man olketa kam. Judah hem sei long olketa haf brata bilong hem: ‘Iumi salem hem long olketa Ish′ma‧el‧ite.’ So hem nao samting wea olketa duim. Olketa salem Joseph for 20 silver selen. Diswan hem barava nogud samting for duim!

Wanem nao olketa brata hia bae talem long dadi bilong olketa? Olketa killim dae wanfala goat and putim naesfala coat bilong Joseph long blood bilong goat. Then olketa tekem coat hia go long dadi bilong olketa Jacob and sei: ‘Mifala faendem diswan. Trae lukim sapos hem coat bilong Joseph.’

Jacob lukim hem tru nao. Hem krae olsem: ‘Masbi wanfala wild animal nao killim dae Joseph.’ And datwan nao samting wea olketa brata bilong Joseph laekem dadi bilong olketa for tingim. Jacob, hem sorre fogud. Hem krae for plande day. Bat Joseph hem no dae. Bae iumi lukim samting wea happen long hem.

Genesis 37:1-35.



Olketa Kwestin

  • Why nao olketa brata bilong Joseph jealous long hem, and wanem nao olketa duim?
  • Olketa brata bilong Joseph laek for duim wanem long hem, bat wanem nao Reuben hem talem?
  • Wanem nao happen taem olketa Ishmaelite man go pas?
  • Wanem nao olketa brata bilong Joseph duim for mekem dadi bilong olketa tingse Joseph hem dae finis?

Samfala extra kwestin

  • Readim Genesis 37:1-35.

    Hao nao olketa Christian savve followim example bilong Joseph long wei for reportim eniwan wea duim rong fasin insaed kongregeson? (Gen. 37:2; Lev. 5:1; 1 Cor. 1:11)

    Wanem nao mekem olketa brata bilong Joseph duim nogud samting long hem? (Gen. 37:11, 18; Prov. 27:4; Jas. 3:14-16)

    Wanem samting wea Jacob duim nao hem normal samting wea man duim taem hem feel sorre from samwan hem lovem hem dae? (Gen. 37:35)