Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 20: Dinah Hem Insaed Trabol

Story 20: Dinah Hem Insaed Trabol

WASWE, iu lukim hu nao Di′nah hem go for visitim? Hem go for lukim samfala gele wea stap long Ca′naan. Waswe, iu ting dadi bilong hem Jacob hem hapi long diswan? For helpem iumi ansarem disfala kwestin, trae for rememberim tingting bilong Abraham and Isaac abaotem olketa woman bilong Ca′naan.

Dinah visitim olketa gele long Canaan

Waswe, Abraham laekem son bilong hem Isaac for maritim wanfala gele from Ca′naan? Nomoa, hem no laekem. Waswe, Isaac and Re‧bek′ah laekem son bilong tufala Jacob for maritim wanfala gele from Ca′naan? Nomoa, tufala no laekem tu. Iu savve why nao olsem?

Hem from pipol bilong Ca′naan worshipim olketa giaman god. Olketa no gudfala pipol for tekem olsem hasband or waef, and olketa no gudfala pipol for fren gud witim tu. So iumi savve nao hao Jacob hem no hapi witim wei wea dota bilong hem fren witim olketa gele bilong Ca′naan.

Gogo, Di′nah insaed trabol nao. Waswe, iu savve lukim datfala man bilong Ca′naan long piksa wea lukluk long Di′nah? Nem bilong hem She′chem. Wanday taem Di′nah kam for visit, She′chem tekem Di′nah and forcem hem for leidaon witim hem. Diswan hem rong, from olketa marit man and woman nomoa fit for leidaon tugeta. Disfala nogud samting wea She′chem duim long Di′nah hem mekem plande trabol moa kamap.

Taem olketa brata bilong Di′nah herem samting wea happen, olketa kros fogud. Tufala long olketa, Sim′e‧on and Le′vi, wea barava kros tekem sword and go long taon and kasholem olketa man taem olketa no redi. Olketa and olketa brata bilong olketa killim dae She′chem and evri nara man long there. Jacob hem kros fogud bikos olketa son bilong hem duim disfala nogud samting.

Hao nao evri trabol hia start? Hem from Di′nah fren witim pipol wea no obeyim olketa law bilong God. Iumi nating want for fren witim pipol olsem, iaman?

Genesis 34:1-31.



Olketa Kwestin

  • Why nao Abraham and Isaac no laekem pikinini bilong olketa for maritim pipol from land bilong Canaan?
  • Waswe, Jacob hem hapi taem dota bilong hem fren witim olketa gele from Canaan?
  • Hu nao man wea lukluk long Dinah long piksa, and wanem nogud samting nao hem duim?
  • Wanem nao tufala brata bilong Dinah, Simeon and Levi, duim taem tufala herem samting wea happen?
  • Waswe, Jacob hem hapi long samting wea Simeon and Levi duim?
  • Hao nao evri trabol long famili hem start?

Samfala extra kwestin

  • Readim Genesis 34:1-31.

    Waswe, Dinah hem go wantaem nomoa long olketa gele from land bilong Canaan? Explainim diswan. (Gen. 34:1)

    Why nao Dinah garem lelebet blame tu for wei wea Shechem spoelem hem? (Gal. 6:7)

    Hao nao olketa young wan distaem savve showimaot olketa followim warning wea olketa lanem from example bilong Dinah? (Prov. 13:20; 1 Cor. 15:33; 1 John 5:19)