Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 19: Jacob Garem Big Famili

Story 19: Jacob Garem Big Famili
Jacob and olketa son bilong hem

LUKIM disfala bigfala famili. Olketa hia 12-fala son bilong Jacob. And hem garem samfala dota tu. Waswe, iu savve long nem bilong eni pikinini hia? Bae iumi lanem nem bilong samfala.

Le′ah hem bornem Reu′ben, Sim′e‧on, Le′vi and Judah. Taem Rachel lukim hem no garem eni pikinini, hem feel sorre tumas. So hem givim gele servant bilong hem Bil′hah long Jacob, and Bil′hah garem tufala son wea nem bilong tufala Dan and Naph′ta‧li. Then Le′ah givim gele servant bilong hem Zil′pah tu long Jacob, and Zil′pah bornem Gad and Ash′er. Gogo, Le′ah bornem tufala son moa, Is′sa‧char and Zeb′u‧lun.

Then Rachel garem wanfala pikinini. Nem bilong hem Joseph. Bihaen, iumi bae lanem plande samting abaotem Joseph, bikos hem kamap wanfala barava important man. Olketa hia nao 11-fala son wea born from Jacob taem hem stap witim dadi bilong Rachel, La′ban.

Jacob garem samfala dota tu, bat Bible talem iumi nem bilong wanfala long olketa nomoa. Hem nao Di′nah.

Gogo, Jacob hem disaed for lusim La′ban and go bak long Ca′naan. So hem hipimap bigfala famili bilong hem and staka sheep and buluka, and startim longfala wakabaot hia.

Bihaen Jacob and famili bilong hem kam bak long Ca′naan, Rachel hem bornem narafala son. Diswan happen taem olketa long road. Rachel hem kasem hardfala taem, and gogo hem dae taem hem bornem pikinini hia. Bat disfala smol baby boy hem olraet. Jacob kolem hem Benjamin.

Iumi want for rememberim nem bilong 12-fala son bilong Jacob bikos full nation bilong Israel kamaot from olketa. Tru nao, 12-fala tribe bilong Israel olketa nem followim 10-fala son bilong Jacob and tufala son bilong Joseph. Isaac stap for plande year bihaen evri boy hia born, and hem hapi tumas for garem plande grani. Bat iumi bae lukim samting wea happen long grani bilong hem Di′nah.

Genesis 29:32-35; 30:1-26; 35:16-19; 37:35.



Olketa Kwestin

  • Hu nao nem bilong sixfala son bilong Jacob wea Leah, firstfala waef bilong hem bornem?
  • Hu nao tufala son bilong Jacob wea servant bilong Leah, Zilpah hem bornem?
  • Hu nao nem bilong tufala son bilong Jacob wea servant bilong Rachel, Bilhah hem bornem?
  • Hu nao tufala son wea Rachel bornem, bat wanem nao happen taem mek-tu son hem born?
  • Olsem piksa hem showim, haomas son nao Jacob garem, and olketa kamap laen dadi bilong hu?

Samfala extra kwestin

  • Readim Genesis 29:32-35; 30:1-26; and 35:16-19.

    Hao nao olketa givim nem long olketa Jew pikinini bifor, olsem olketa duim long 12-fala son bilong Jacob?

  • Readim Genesis 37:35.

    Nomata Bible talem nem bilong Dinah nomoa, hao nao iumi savve Jacob garem samfala nara dota tu? (Gen. 37:34, 35)