Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 18: Jacob Hem Go Long Haran

Story 18: Jacob Hem Go Long Haran

WASWE, iu savve hu nao olketa man hia wea Jacob hem story witim? Bihaen hem gogo for plande day, Jacob meetim olketa klosap long wanfala well. Olketa lukaftarem olketa sheep. Jacob askem olketa: ‘Iufala kam from wea?’

Olketa sei: ‘Ha′ran.’

Jacob hem askem olketa: ‘Waswe, iufala savve long La′ban?’

Olketa sei: ‘Ia, lukim, dota bilong hem Rachel nao long there witim olketa sheep bilong hem.’ Waswe, iu savve lukim Rachel hem wakabaot kam?

Jacob meetim Rachel

Taem Jacob lukim Rachel witim olketa sheep bilong uncle bilong hem La′ban, hem go and aotem ston from well mekem olketa sheep savve drink. Then Jacob kissim Rachel and talem hem hu nao hem. Rachel hapi tumas and hem go long haos and talem diswan long dadi bilong hem La′ban.

La′ban barava hapi for Jacob stap witim olketa. And hem hapi tu taem Jacob ask for maritim Rachel. Bat, hem askem Jacob for waka long field bilong hem for sevenfala year for Rachel. From hem barava lovem Rachel, Jacob hem duim diswan. Bat long taem bilong marit, iu savve wanem nao happen?

La′ban givim firstfala dota bilong hem Le′ah for Jacob and no Rachel. Taem Jacob willing for waka for La′ban for narafala seven year moa, La′ban givim hem Rachel olsem waef bilong hem tu. Long datfala taem God letem olketa man for garem winim wanfala waef. Bat distaem, olsem Bible showimaot, man mas garem wanfala waef nomoa.

Genesis 29:1-30.



Olketa Kwestin

  • Hu nao gele insaed long disfala piksa, and wanem nao Jacob duim for hem?
  • Wanem nao Jacob willing for duim mekem hem maritim Rachel?
  • Wanem nao Laban duim long taem wea Jacob redi for maritim Rachel?
  • Wanem nao Jacob agree for duim for mekem hem fit for maritim Rachel?

Samfala extra kwestin

  • Readim Genesis 29:1-30.

    Nomata taem Laban trikim hem, hao nao Jacob showimaot hem wanfala gud man, and wanem nao iumi savve lanem from diswan? (Gen. 25:27; 29:26-28; Matt. 5:37)

    Hao nao example bilong Jacob showimaot tru love hem difren from wei for barava laekem nomoa lukluk bilong samwan? (Gen. 29:18, 20, 30; Song of Sol. 8:6)

    Hu nao fofala woman wea Jacob garem olketa pikinini witim? (Gen. 29:23, 24, 28, 29)