Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 12: Olketa Buildim Wanfala Big Taoa

Story 12: Olketa Buildim Wanfala Big Taoa

PLANDE year go pas. Olketa son bilong Noah garem plande pikinini. And olketa pikinini bilong olketa grow big and garem plande pikinini tu. No longtaem nomoa plande pipol nao stap long earth.

Wanfala hem pikinini bilong grani bilong Noah, and nem bilong hem Nim′rod. Hem wanfala nogud man wea savve hunting and killim dae olketa animal and man tu. Nim′rod mekem hemseleva kamap king tu for rul ovarem nara pipol. God no laekem Nim′rod.

Long datfala taem evriwan tok long sem languis. Nim′rod want for keepim evriwan tugeta mekem hem savve rul ovarem olketa. So iu savve wanem nao hem duim? Hem talem pipol hia for buildim wanfala bigfala taon and wanfala bigfala taoa insaed. Lukim olketa taem olketa wakem olketa brik long piksa. Jehovah hem no hapi witim disfala building. God laekem pipol for muv long narafala ples and stap evriwea long earth. Bat pipol hia sei: ‘Kam! Iumi buildim wanfala taon and wanfala taoa wea hae tumas wea top bilong hem kasem heven. Then iumi bae garem bigfala nem!’ Pipol hia laekem honor for olketa seleva, and no for God.

So God stopem pipol hia for buildim datfala taoa. Waswe, iu savve hao nao hem duim diswan? Hem mekem pipol hia for tok long olketa difren languis, and no wanfala nomoa. Olketa wea build hia no savve minim nao wanem narawan hem talem. Dastawe taon bilong olketa garem nem Ba′bel, or Babylon, wea minim “Wei for Konfius.”

So pipol start for lusim Ba′bel. Olketa wea tok long sem languis go and stap tugeta long olketa narafala part long earth.

Genesis 10:1, 8-10; 11:1-9.

Olketa wakaman buildim wanfala big taoa


Olketa Kwestin

  • Hu nao Nimrod, and hao nao God ting long hem?
  • Olsem piksa hem showim, why nao pipol wakem olketa brik?
  • Why nao Jehovah no hapi long disfala building waka?
  • Hao nao Jehovah stopem wei for buildim datfala taoa?
  • Wanem nao nem bilong datfala taon, and wanem nao datfala nem hem minim?
  • Wanem nao happen long pipol hia bihaen God mekem olketa for toktok long olketa difren languis?

Samfala extra kwestin

  • Readim Genesis 10:1, 8-10.

    Wanem fasin nao Nimrod hem showimaot, and hao nao datwan olsem wanfala warning for iumi? (Prov. 3:31)

  • Readim Genesis 11:1-9.

    Why nao pipol buildim datfala taoa, and why nao datwan hem mas fail? (Gen. 11:4; Prov. 16:18; John 5:44)