Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 9: Noah Buildim Wanfala Ark

Story 9: Noah Buildim Wanfala Ark
Pipol laflaf long Noah

NOAH garem wanfala waef and thrifala son. Nem bilong olketa son hem Shem, Ham and Ja′pheth. Each wan long thrifala son hia garem waef. So eitfala pipol nao insaed long famili bilong Noah.

God mekem Noah duim difren samting. Hem talem hem for buildim wanfala big ark. Disfala ark hem olsem bigfala ship, bat hem luk olsem big, longfala box. God hem sei: ‘Buildim datwan thri story hae, and mekem olketa rum insaed.’ Olketa rum hem for Noah and famili bilong hem, olketa animal, and kaikai wea olketa bae needim.

God talem Noah for wakem disfala ark mekem no eni wata go insaed tu. God sei: ‘Mi bae sendem wanfala big flood bilong wata and finisim full world. Evriwan wea no stap insaed long ark bae dae.’

Noah and olketa son bilong hem obeyim Jehovah and start for build. Bat olketa pipol laflaf nomoa. Olketa gohed for duim nogud samting. No eniwan bilivim Noah taem hem talem olketa samting wea God bae duim.

Famili bilong Noah tekem olketa animal and kaikai long ark

Hem tek longfala taem for buildim ark. Bihaen plande year, hem finis. Then God talem Noah for tekem olketa animal long ark. For samfala animal God sei for tekem tufala, man wan and mere wan. Bat for narakaen animal, God talem Noah for tekem sevenfala. God talem Noah for tekem evri difren kaen bird tu. Noah duim evri samting wea God talem.

Bihaen, Noah and famili bilong hem tu go insaed ark. Then God satem door. Noah and famili bilong hem weit. Tingim sapos iu stap insaed long ark witim olketa, and iufala weit. Waswe, wanfala flood bae really kam olsem God talem?

Genesis 6:9-22; 7:1-9.



Olketa Kwestin

  • Haomas pipol nao insaed famili bilong Noah, and wanem nao nem bilong thrifala son bilong hem?
  • Wanem samting nao God askem Noah for duim, and why nao olsem?
  • Wanem nao pipol duim taem Noah story abaotem ark long olketa?
  • Wanem nao God talem Noah for duim witim olketa animal?
  • Bihaen God satem door bilong ark, wanem nao Noah and famili bilong hem mas duim?

Samfala extra kwestin

  • Readim Genesis 6:9-22.

    Wanem nao mekem Noah wanfala nambawan worshiper bilong tru God? (Gen. 6:9, 22)

    Jehovah feel hao abaotem raf fasin, and hao nao diswan shud affectim wei wea iumi chusim hapitaem? (Gen. 6:11, 12; Ps. 11:5)

    Long wanem wei nao iumi savve followim example bilong Noah taem iumi kasem direction from organization bilong Jehovah? (Gen. 6:22; 1 John 5:3)

  • Readim Genesis 7:1-9.

    Hao nao wei wea Jehovah ting long Noah wea no perfect olsem hem raeteous hem encouragem iumi distaem? (Gen. 7:1; Prov. 10:16; Isa. 26:7)