Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 8: Olketa Giant Stap Long Earth

Story 8: Olketa Giant Stap Long Earth

SAPOS wanfala man hem wakabaot kam long iu and hem tol go kasem ruf long haos bilong iu, hao nao bae iu ting long hem? Hem wanfala giant! Wanfala taem olketa really giant stap long earth. Bible hem sei dadi bilong olketa hem olketa angel from heven. Bat hao nao olsem?

Olketa giant wea raf

Remember, nogud angel Satan hem busy for mekem trabol kamap. Hem trae for mekem olketa angel bilong God for kamap nogud tu. Gogo, samfala angel start for lisin long Satan. Olketa finis for duim waka wea God givim long olketa long heven. And olketa kam daon long earth and mekem body bilong olketa kamap olsem olketa man. Waswe, iu savve why nao olsem?

Bible sei olketa duim diswan bikos olketa son bilong God hia lukim olketa woman wea luk naes long earth and want for stap witim olketa. So olketa kam daon long earth and maritim olketa woman hia. Bible sei diswan hem rong, bikos God mekem olketa angel for stap long heven.

Taem olketa angel and waef bilong olketa garem baby, olketa baby hia difren. Firstaem olketa no luk difren tumas. Bat olketa gohed for grow moa big, and moa strong, go kasem taem wea olketa giant nao.

Olketa giant hia nogud tumas. And from olketa big and strong tumas, olketa spoelem pipol. Olketa trae for forcem evriwan for kamap nogud olsem olketa seleva.

E′noch hem dae finis, bat wanfala man long earth nao hem gudfala man. Nem bilong hem Noah. Hem evritaem duim samting wea God laekem hem for duim.

Wanday God talem Noah hao Hem redi nao for finisim evribit evri nogud pipol. Bat God bae sevem Noah, famili bilong hem, and plande animal. Iumi lukim hao God duim diswan.

Genesis 6:1-8; Jude 6.



Olketa Kwestin

  • Wanem nao happen taem samfala angel bilong God lisin long Satan?
  • Why nao samfala angel lusim waka bilong olketa long heven and kam daon long earth?
  • Why nao hem rong for olketa angel kam daon long earth and kamap olsem man?
  • Hao nao olketa pikinini bilong olketa angel olketa difren?
  • Olsem piksa showim, wanem nao olketa pikinini bilong olketa angel duim taem olketa kamap giant?
  • Hu nao nara gudfala man wea stap long earth bihaen long Enoch, and why nao God laekem hem?

Samfala extra kwestin

  • Readim Genesis 6:1-8.

    Wanem nao Genesis 6:6 showimaot abaotem wei wea fasin bilong iumi savve affectim feeling bilong Jehovah? (Ps. 78:40, 41; Prov. 27:11)

  • Readim Jude 6.

    Long wanem wei nao olketa angel “wea no keepim firstfala position bilong olketa” long taem bilong Noah kamap olsem example for iumi distaem? (1 Cor. 3:5-9; 2 Pet. 2:4, 9, 10)