Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 5: Hardfala Taem Hem Start

Story 5: Hardfala Taem Hem Start

AOTSAED long garden bilong Eden, Adam and Eve kasem plande problem. Tufala need for waka hard for kaikai bilong tufala. Tufala no lukim olketa naesfala frut tree, bat tufala lukim olketa bush and nila grass grow raonem olketa. Diswan nao samting wea happen taem Adam and Eve no obeyim God and no fren moa witim Hem.

Adam hem waka hard witim son bilong hem

Bat samting wea moa worse winim datwan, Adam and Eve gogo for dae. Remember, God warnim olketa hao olketa bae dae sapos olketa kaikai from datfala tree. Long sem day wea tufala kaikaim, tufala gogo for dae nao. Tufala krangge tumas for no lisin long God!

Olketa pikinini bilong Adam and Eve born bihaen God aotem dadi and mami bilong olketa from garden bilong Eden. Diswan minim olketa pikinini tu bae kamap olo and dae.

Sapos Adam and Eve obeyim Jehovah, tufala and olketa pikinini bilong tufala fit for kasem hapi living. Olketa savve stap olowe and hapi long earth. No eniwan bae kamap olo, garem sik and dae.

God laekem pipol for stap olowe and hapi, and Hem promis for duim diswan wanday. Long datfala taem full earth bae luk naes tumas, and evri pipol bae healthy. And evriwan long earth bae fren gud tugeta and fren gud witim God tu.

Eve witim olketa pikinini bilong hem

Bat Eve hem no fren moa witim God. So taem hem bornem olketa pikinini bilong hem, hem no isi. Hem feel pain. Wei wea hem no obeyim Jehovah barava bringim hem bigfala sorre, iaman?

Adam and Eve garem plande son and dota. Taem firstborn son bilong tufala born, tufala kolem hem Cain. Mek-tu son bilong tufala hem Abel. Wanem nao happen long olketa? Waswe, iu savve?

Genesis 3:16-23; 4:1, 2; Revelation 21:3, 4.



Olketa Kwestin

  • Laef hem hao for Adam and Eve aotsaed long garden bilong Eden?
  • Wanem nao start for happen long Adam and Eve, and why nao olsem?
  • Why nao olketa pikinini bilong Adam and Eve kamap olo and dae?
  • Tingim sapos Adam and Eve obeyim Jehovah, laef bilong tufala and olketa pikinini bilong tufala bae hao?
  • Hao nao wei wea Eve no obey hem mekem hem kasem pain?
  • Wanem nao nem bilong tufala first son bilong Adam and Eve?
  • Hu nao olketa nara pikinini insaed long disfala piksa?

Samfala extra kwestin

  • Readim Genesis 3:16-23 and 4:1, 2.

    Hao nao wei wea God cursim graon hem affectim laef bilong Adam? (Gen. 3:17-19; Rom. 8:20, 22)

    Why nao nem bilong Eve, wea minim “Datwan wea Laef,” hem fitim? (Gen. 3:20)

    Hao nao Jehovah showimaot hem tingim Adam and Eve nomata bihaen tufala sin? (Gen. 3:7, 21)

  • Readim Revelation 21:3, 4.

    Wanem nao olketa “samting bifor” wea iu laekem tumas for finis?