Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 4: Why Tufala Lusim Hom

Story 4: Why Tufala Lusim Hom

LUKIM samting wea happen. Olketa aotem Adam and Eve from naesfala garden bilong Eden. Waswe, iu savve why nao olsem?

God aotem Adam and Eve from garden bilong Eden

Hem from tufala duim samting wea barava nogud. So Jehovah hem panisim tufala. Waswe, iu savve long nogud samting wea Adam and Eve duim?

Tufala duim samting wea God talem tufala for no duim. God sei tufala savve kaikai from olketa tree bilong garden. Bat God hem sei for no kaikai from wanfala tree, sapos olketa kaikaim olketa bae dae. Hem keepim datfala tree for hemseleva. And iumi savve hem rong for tekem samting bilong narafala man, iaman? So wanem nao happen?

Wanday, taem Eve hem stap seleva long garden, wanfala snek tok long hem. Tingim datwan! Hem talem Eve for kaikaim frut from tree wea God sei tufala mas no kaikaim. Bat taem Jehovah wakem olketa snek, hem no mekem olketa for toktok. So diswan minim narafala man nao mekem disfala snek for toktok. Hu nao datfala man?

Hem no Adam. So hem mas wanfala spirit wea Jehovah wakem bifor hem wakem earth. Hem nao olketa angel, wea iumi no savve lukim. Wanfala long olketa angel hia kamap praod tumas. Hem start for tingse hem fit for kamap wanfala ruler olsem God. And hem laekem pipol for obeyim hem winim wei for obeyim Jehovah. Hem nao angel wea mekem snek hia toktok.

Disfala angel hem trikim Eve. Taem hem sei Eve bae kamap olsem God sapos hem kaikaim datfala frut, Eve bilivim hem nao. So hem kaikaim, and Adam tu kaikaim. Adam and Eve no obeyim God, dastawe olketa lusim naesfala garden hom bilong olketa.

Bat wanday God bae mekem full earth kamap wanfala naesfala ples olsem garden bilong Eden. Bihaen, iumi bae lanem hao iu savve share long diswan. Bat distaem, iumi lukim wanem nao happen long Adam and Eve.

Genesis 2:16, 17; 3:1-13, 24; Revelation 12:9.



Olketa Kwestin

  • Taem iu lukim piksa, wanem nao happen long Adam and Eve?
  • Why nao Jehovah panisim tufala?
  • Wanem nao wanfala snek talem long Eve?
  • Hu nao mekem datfala snek story long Eve?
  • Why nao Adam and Eve lusim Paradaes wea tufala stap insaed?

Samfala extra kwestin

  • Readim Genesis 2:16, 17 and 3:1-13, 24.

    Hao nao kwestin wea datfala snek askem long Eve mekem hem garem rong tingting abaotem Jehovah? (Gen. 3:1-5; 1 John 5:3)

    Long wanem wei nao samting wea kasem Eve hem olsem wanfala warning for iumi? (Phil. 4:8; Jas. 1:14, 15; 1 John 2:16)

    Long wanem wei nao Adam and Eve fail for acceptim responsibility for samting wea tufala duim? (Gen. 3:12, 13)

    Hao nao tufala angel wea Jehovah putim long spialaen bilong garden long east saed sapotim sovereign rul bilong hem? (Gen. 3:24)

  • Readim Revelation 12:9.

    Long wanem wei nao Satan hem win for mekem olketa man againstim rul bilong God? (1 John 5:19)