Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 3: Firstfala Man and Woman

Story 3: Firstfala Man and Woman

WANEM nao hem difren long disfala piksa? Ia, pipol nao stap insaed. Olketa nao firstfala man and woman. Hu nao wakem olketa? Hem God nao. Waswe, iu savve long nem bilong God? Hem Jehovah. And hem kolem man and woman hia Adam and Eve.

Adam and Eve long garden bilong Eden

Jehovah God wakem Adam long wei wea hem tekem samfala dust from graon and mekem wanfala perfect body, body bilong wanfala man. Then hem blow go insaed long nose bilong man hia, and Adam laef nao.

Jehovah God garem waka for Adam. Hem talem Adam for givim nem long evri difren kaen animal long there. Maet Adam hem lukluk long olketa animal for longfala taem mekem hem savve chusim best nem for evriwan long olketa. Taem Adam hem givim nem long olketa, hem start for lukim wanfala samting. Waswe, iu savve wanem nao datwan?

Evri animal garem partner bilong olketa. Olketa dadi elephant and mami elephant stap, and dadi lion and mami lion tu. Bat Adam no garem eni partner. So Jehovah mekem Adam for deepim sleep, and hem tekem wanfala bon from saed body bilong hem. Then Jehovah iusim disfala bon for wakem wanfala woman for Adam, and hem kamap waef bilong hem.

Adam hem hapi fogud! And Eve tu hem hapi tumas for stap insaed long barava naesfala garden! So tufala fit for garem olketa pikinini and stap tugeta and hapi.

Jehovah laekem Adam and Eve for stap olowe. Hem laekem tufala for mekem full earth luk naes olsem garden bilong Eden. Adam and Eve hapi tumas taem tufala tingim hao olketa savve duim diswan! Waswe, iu tu laek for share for mekem earth kamap naesfala garden? Bat hapi wea Adam and Eve kasem hem no stap olowe. Bae iumi lukim why nao olsem.

Psalm 83:18; Genesis 1:26-31; 2:7-25.



Olketa Kwestin

  • Hao nao piksa long Story 3 hem difren from piksa long Story 2?
  • Hu nao wakem firstfala man, and hu nao nem bilong firstfala man hia?
  • Wanem waka nao God givim long Adam for duim?
  • Why nao God mekem Adam for deep sleep?
  • Adam and Eve fit for laef for hao long, and wanem waka nao Jehovah laekem tufala for duim?

Samfala extra kwestin

  • Readim Psalm 83:18.

    Hu nao nem bilong God, and wanem nao position bilong hem? (Jer. 16:21; Dan. 4:17)

  • Readim Genesis 1:26-31.

    Wanem nao barava spesol samting wea God wakem long mek-six day, and hao nao diswan hem difren from olketa animal? (Gen. 1:26)

    Jehovah givim wanem samting for olketa man and animal? (Gen. 1:30)

  • Readim Genesis 2:7-25.

    Wanem nao Jehovah duim taem hem givim assignment long Adam for nemem olketa animal? (Gen. 2:19)

    Hao nao Genesis 2:24 helpem iumi for minim tingting bilong Jehovah abaotem marit, wei for separate, and divorce? (Matt. 19:4-6, 9)