Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa  |  No. 1 2017

 FOLLOWIM FAITH BILONG OLKETA | ENOCH

‘God Hapi Long Hem’

‘God Hapi Long Hem’

LONG taem bilong Enoch, pipol savve laef for longfala taem winim pipol distaem. Olsem example, Enoch hem laef for samting olsem 365 year, wea hem olsem fofala genereson distaem! Long datfala taem, pipol no ting long man wea 365 year olsem hem olo. Nara example hem Adam. Hem laef for winim 600 year finis taem Enoch hem born, and hem gohed for laef for samting olsem 300 year moa! Bat samfala grani bilong Adam, olketa laef for longfala taem winim hem. So nomata Enoch hem 365 year, hem still strong and hem fit for laef for staka handred year moa, bat hem no olsem.

Taem Enoch 365 year, God markem hem for talem wanfala message long pipol wea no worshipim God. Datfala message mekem olketa barava kros and olketa les for herem datwan. Olketa heitim Enoch and laek for killim hem dae. Olketa barava heitim datfala God wea sendem Enoch for talem datfala message long olketa. Olketa no fit for faetem Jehovah, God bilong Enoch, bat olketa savve faetem Enoch! So Enoch mas ranawe from olketa. Maet datwan mekem Enoch for tingim hem bae no lukim famili bilong hem moa. Maet hem tingim waef, olketa gele bilong hem, son bilong hem Methuselah, and grani bilong hem Lamech. (Genesis 5:21-23, 25) Luk olsem Enoch hem no wei nao.

Bible no storyim staka samting abaotem Enoch. Tu-thri scripture nomoa story abaotem hem. (Genesis 5:21-24; Hebrew 11:5; Jude 14, 15) Bat olketa scripture hia helpem iumi for luksavve Enoch hem man wea garem strongfala faith. Waswe, iu garem famili wea iu mas lukaftarem? Or waswe, enitaem iu mas strong for duim stret samting nomata hem no isi? Sapos olsem, iu savve lane from faith bilong Enoch.

“ENOCH GOHED FOLLOWIM TRUFALA GOD”

Enoch hem mek-seven man long laen bilong Adam. Long datfala taem, olketa man savve laef for longfala taem bikos hem no longtaem nomoa bihaen Adam and Eve lusim perfect laef. Nomata olsem, wei bilong olketa hem barava nogud. Pipol raf fogud. Datwan hem start taem Cain hem killim dae brata bilong hem Abel. Then wanfala wea born long laen bilong Cain, hem barava raf winim Cain! Kasem mek-thri genereson, nara nogud samting hem kamap. Pipol savve iusim datfala nem Jehovah long barava nogud wei wea no showimaot respect.—Genesis 4:8, 23-26.

Datwan hem barava kamap big long taem bilong Enoch. So taem Enoch hem growap, hem mas disaedem sapos hem bae duim sem samting wea olketa nara pipol duim, or hem bae mekhae long Jehovah, datfala tru God wea wakem heven and earth. Masbi story bilong Abel encouragem Enoch bikos Abel worshipim Jehovah nomata gogo Cain killim hem dae for datwan. Enoch tu laek for worshipim Jehovah. Genesis 5:22 hem sei: “Enoch gohed followim trufala God.” Datwan showimaot Enoch hem fren gud witim God nomata staka pipol long datfala taem no followim God. Hem nao  firstfala man wea Bible sei hem followim trufala God.

Datfala scripture storyim bihaen Methuselah, son bilong Enoch hem born, Enoch gohed for followim Jehovah. So Enoch hem garem famili finis taem hem 65 year. Bible no storyim nem bilong waef bilong hem and haomas “son and dota” nao hem garem. Sapos wanfala dadi hem followim God, hem mas provaedem wanem famili needim and lukaftarem famili bilong hem long spiritual wei. Enoch luksavve Jehovah laekem hem for faithful long waef bilong hem. (Genesis 2:24) And hem teachim olketa pikinini bilong hem abaotem Jehovah God. Waswe, eni pikinini or grani bilong Enoch followim Jehovah tu?

Bible no storyim staka samting abaotem datwan. Bible sei Methuselah, son bilong Enoch hem laef for longfala taem winim olketa narawan long datfala taem, bat Bible no talem sapos Methuselah followim God or nomoa. Hem dae long year wea Flood hem kam. Methuselah hem garem wanfala son wea nem bilong hem Lamech. Bihaen Lamech hem born, grani bilong hem Enoch gohed for laef for winim 100 year. Lamech garem faith long Jehovah. Jehovah iusim Lamech for talemaot wanfala profesi abaotem son bilong hem Noah, and datfala profesi hem kamap tru bihaen long Flood. Noah tu hem followim God olsem Enoch. Enoch hem dae finis taem Noah hem born. Bat Enoch hem gudfala example for olketa wea born bihaen hem dae. Maet Noah lane abaotem faith bilong Enoch from dadi bilong hem Lamech, or from grani bilong hem Methuselah, or from Jared, dadi bilong Enoch wea dae taem Noah hem 366 year.—Genesis 5:25-29; 6:9; 9:1.

Nomata Adam hem perfect, hem sin againstim Jehovah and hem nogud example long wei for bighed for olketa wea kam from laen bilong hem. Wanem hem duim mekem olketa for safa. Bat Enoch no olsem. Nomata hem no perfect, hem gohed followim God, and hem gudfala example for olketa long famili bilong hem. Adam hem dae taem Enoch hem 308 year. Iumi no savve sapos Enoch or eni narawan long famili bilong Adam sorre taem hem dae. Bat nomata olsem, Enoch hem “gohed followim trufala God.”—Genesis 5:24.

Sapos iu wanfala dadi or mami, tingim wanem iu savve lanem from faith bilong Enoch. Hem important for provaedem wanem famili needim, bat hem barava important for helpem famili for fren gud witim Jehovah tu. (1 Timothy 5:8) Wanem iu talem and duim savve helpem famili bilong iu for laek worshipim Jehovah. Taem iu followim God olsem Enoch, datwan hem gudfala example for famili bilong iu followim.

ENOCH ‘TALEM PROFESI ABAOTEM OLKETA’

Enoch maet feel sorre bikos hemseleva nomoa garem faith long God. Bat waswe, Jehovah luksavve hem man wea garem faith? Ia. Wanday Jehovah hem story witim hem. Hem markem Enoch for talemaot wanfala message long pipol  long datfala taem. God chusim hem for kamap profet. Hem nao firstfala profet wea message bilong hem stap long Bible. Iumi savve long diswan bikos Jude wea hem haf brata bilong Jesus hem raetem profesi wea Enoch talem staka handred year bihaen datwan. *

Wanem profesi nao Enoch talem? Datfala profesi hem sei: “Jehovah hem kam witim staka thousand holy angel bilong hem for judgem evriwan, and for showimaot olketa wea no followim God olketa guilty bikos long olketa nogud samting olketa duim and talem wea againstim hem.” (Jude 14, 15) Taem iu readim datfala profesi, maet hem luk olsem God duim finis wanem Enoch profesi abaotem. Olketa nara profesi tu savve storyim samting olsem hem happen finis. Olketa raetem olketa profesi long wei olsem bikos nomata datfala profesi no kamap tru yet, hem olsem hem happen finis!—Isaiah 46:10.

Enoch hem no fraet for talemaot message bilong God long pipol wea raf

Tingim, datfala message wea Enoch talemaot showimaot God bae duim samting long pipol wea no followim hem. Datfala warning hem for evri pipol long datfala taem bikos start long taem wea Adam and Eve sin againstim Jehovah, wei bilong pipol hem barava nogud. Jehovah and “staka thousand holy angel bilong hem” bae finisim olketa nogud pipol hia. Enoch no fraet for talemaot datfala message, nomata hemseleva nomoa duim datwan! Long datfala taem, masbi Lamech hem lukim wei wea grani bilong hem no fraet for preach and hem barava tinghae long datwan.

Datfala profesi bilong Enoch hem kamap tru taem Jehovah finisim olketa nogud pipol long Flood long taem bilong Noah. Taem iumi tingim faith wea Enoch garem, datwan maet mekem iumi for tingim, ‘Waswe, mi garem strongfala faith olsem Enoch and mi bilivim disfala world hem klosap for finis?’ Datfala judgment message wea Enoch talemaot hem fitim taem bilong iumi tu. Samting wea happen long taem bilong Noah showimaot wanem bae happen long nogud pipol long taem bilong iumi tu. (Matthew 24:38, 39; 2 Peter 2:4-6) Distaem Jehovah and olketa angel bilong hem redi for finisim olketa nogud pipol. Iumi laek for gohed faithful olsem Enoch and for warnim pipol abaotem datwan. Maet iumi feel sorre bikos olketa long famili and olketa fren bilong iumi no worshipim Jehovah. Bat tingim, Jehovah lukaftarem Enoch and hem bae lukaftarem iumi tu!

“GOD NAO TEKEM HEM, MEKEM HEM NO SAFA TAEM HEM DAE”

Wanem nao happen taem Enoch hem dae? Genesis 5:24 hem sei: “Enoch gohed for followim trufala God. Then hem no stap nao, bikos God tekem hem.” Aposol Paul hem sei tu: “From Enoch garem faith, God nao tekem hem, mekem hem no safa taem hem dae, dastawe no eniwan faendem hem. Bat bifor God tekem hem, God showimaot hem hapi long hem.” (Hebrew 11:5) So wea nao God tekem Enoch? Samfala Bible sei God tekem Enoch go long heven. Bat datwan hem no tru bikos Bible storyim Jesus hem first wan for go long heven bihaen hem laef bak.—John 3:13.

So wanem nao datfala toktok ‘God tekem Enoch’ hem minim? Hem minim God mekem Enoch for dae long wei wea hem no safa, mekem  olketa wea againstim hem no killim hem dae long nogud wei. Bat bifor datwan happen God duim samting wea “showimaot hem hapi long hem.” Wanem nao God duim? Bifor Enoch hem dae, luk olsem God mekem hem for lukim wanfala vision abaotem earth wea kamap paradaes. Bihaen datwan, Enoch hem dae. Taem aposol Paul hem storyim Enoch and olketa nara faithful man and woman, hem sei: “Evriwan hia gohed faithful go kasem taem olketa dae.” (Hebrew 11:13) Nomata olketa enemy lukaotem dead body bilong Enoch, olketa no “faendem hem.” Luk olsem Jehovah haedem datfala dead body mekem no eniwan savve spoelem datfala body or iusim long false worship. *

Bible no storyim staka samting abaotem dae bilong Enoch, bat bae iumi storyim samting wea maet happen long hem. Iumi savve olketa enemy bae barava kros long Enoch bikos hem judgem olketa for dae. So hem ranawe from olketa, gogo hem taed tumas. Hem faendem wanfala ples for haed mekem hem rest lelebet, bat hem savve no longtaem olketa enemy bae faendem hem. Hem savve sapos olketa faendem hem bae olketa kill nogud long hem gogo hem dae. Taem hem rest, hem prea long God bilong hem. And datwan mekem hem for garem peace. Then God mekem hem for lukim wanfala vision.

Jehovah tekem Enoch taem pipol lukaotem hem for killim hem dae

Long datfala vision Enoch lukim wanfala naesfala ples. Datfala ples hem luk naes olsem garden long Eden, bat olketa cherub no stap long there for stopem pipol for go long datfala garden. Olketa pipol wea stap long there olketa luk young and olketa healthy. Evriwan stap long peace. Olketa no heitim each other and evriwan worshipim Jehovah nomoa. Enoch luksavve Jehovah hem lovem and hapi long hem. Hem sure hem bae stap long datfala paradaes long future. Hem no wari, and isisi hem satem eye bilong hem, then hem dae nao.

Nomata Enoch hem dae, hem stap sef long memory bilong Jehovah God kam kasem distaem! Jesus promisim long future, evriwan wea stap long grev bae herem toktok bilong Christ and olketa bae laef bak and stap long paradaes.—John 5:28, 29.

Waswe, iu laek for stap long paradaes? Long datfala taem, iumi savve meetim Enoch. Tingim olketa interesting samting wea iumi bae lanem from hem! Hem savve talem iumi evri samting wea happen long hem. Bat distaem, iumi laek for followim faith bilong Enoch. Bihaen Paul story abaotem Enoch hem sei: “Man wea no garem faith no savve mekem God hapi.” (Hebrew 11:6) So iumi laek for mekem God hapi and garem faith olsem Enoch!

^ par. 14 Samfala savveman sei Jude hem quotem profesi bilong Enoch from wanfala buk wea olketa kolem long Book of Enoch, bat datwan hem no tru. No eniwan savve hu nao raetem datfala buk and Enoch tu no raetem datwan. Datfala buk hem storyim profesi bilong Enoch, bat maet man wea raetem datfala buk kasem information from nara buk or maet samwan nao talem hem. Maet Jude tu hem kasem information long sem wei olsem, or maet Jesus nao hem storyim Enoch long Jude bikos taem Jesus hem stap long heven hem lukim olketa samting wea Enoch duim.

^ par. 20 God haedem tu dead body bilong Moses and Jesus mekem pipol no duim eni nogud samting long hem.—Deuteronomy 34:5, 6; Luke 24:3-6; Jude 9.