Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa  |  November 2015

 KAVA SUBJECT

Wanem Kaen Pipol Nao Olketa Jehovah’s Witness?

Wanem Kaen Pipol Nao Olketa Jehovah’s Witness?

“For longtaem nao mi savve long Mike. Hem wanfala Jehovah’s Witness. Bat mi no minim religion bilong hem. Hu nao Jehovah? Why nao Olketa Jehovah’s Witness no celebratem Christmas and Easter? Mi tingse Mike hem joinim wanfala religion wea olketa savve duim olketa krangge samting.”—Becky, California, U.S.A.

“Taem olketa wea stap klosap long mifala start for studyim Bible witim Olketa Jehovah’s Witness, mi laek savve: ‘Wanem nao datfala nem, Jehovah’s Witness, hem minim? Mi tingse disfala nem hem no fitim wanfala religion!’”—Zenon, Ontario, Canada.

“Mi and waef bilong mi tingse Olketa Jehovah’s Witness kam for mekem mifala feel guilty bikos mifala no go long church bilong mifala. Mifala tingse sapos mifala no laekem teaching bilong olketa bigfala church, bae hard for mifala laekem teaching bilong disfala krangge religion.”—Kent, Washington, U.S.A.

“Mi no savve long tru samting abaotem Olketa Jehovah’s Witness and wanem olketa bilivim.”—Cecilie, Esbjerg, Denmark.

Maet iu lukim Olketa Jehovah’s Witness givimaot olketa Bible magasin and buk, and offerim Bible study, taem olketa duim preaching waka long haos tu haos or long street. Maet wanfala long olketa givim disfala magasin long iu. Bat maet iu laek for savve wanem kaen pipol nao Olketa Jehovah’s Witness. Maet iu tu garem sem tingting abaotem olketa, olsem olketa wea iumi storyim antap.

Sapos iu laek for savve wanem kaen pipol nao Olketa Jehovah’s Witness, hu nao iu savve askem? Hu nao savve explainim wanem Olketa Jehovah’s Witness bilivim, hu nao givim selen for sapotim waka bilong olketa and for buildim olketa Kingdom Hall bilong olketa, and why nao olketa evritaem kam long haos bilong iu or laek story witim iu long street?

Cecilie hem sei tu: “Mi readim staka story abaotem Olketa Jehovah’s Witness long Internet. Plande pipol talem staka nogud samting abaotem olketa. Datwan mekem mi for no laekem Olketa Jehovah’s Witness.” Bat gogo mi askem samfala Jehovah’s Witness abaotem biliv bilong olketa and mi luksavve mi no garem stretfala tingting abaotem olketa.

Waswe, iu laek for savve long tru samting abaotem Olketa Jehovah’s Witness? Mifala encouragem iu for story witim eni Jehovah’s Witness. (Proverbs 14:15) Olketa nara article long disfala magasin bae story abaotem wanem kaen pipol nao mifala, wanem mifala bilivim, and waka wea mifala duim.